اسحاق ڈار امریکا دورہ ایک بار پھر پاکستان اور امریکا کے تعلقات میں اہم پیش رفت قرار دیا جا رہا ہے۔ نائب وزیراعظم اور وزیر خارجہ اسحاق ڈار اقوام متحدہ میں اپنی مصروفیات مکمل کرنے کے بعد 29 مئی کو واشنگٹن کا مختصر سرکاری دورہ کریں گے جہاں وہ امریکی وزیر خارجہ اور قومی سلامتی کے مشیر مارکو روبیو سے ملاقات کریں گے۔
دفتر خارجہ کے مطابق ملاقات میں پاکستان اور امریکا کے دوطرفہ تعلقات، خطے کی صورتحال اور عالمی امور پر تفصیلی تبادلہ خیال کیا جائے گا۔ اس دوران دونوں ممالک کے درمیان تجارت، توانائی، سفارتی تعاون اور علاقائی امن سے متعلق معاملات بھی زیر بحث آئیں گے۔
دفتر خارجہ نے اپنے بیان میں کہا ہے کہ پاکستان خطے میں امن و استحکام کیلئے مذاکرات اور سفارتکاری پر یقین رکھتا ہے، اسی تناظر میں اسحاق ڈار کا دورہ دونوں ممالک کے درمیان دیرینہ تعلقات کو مزید مضبوط بنانے کی کوشش کا حصہ ہے۔
اس سے قبل اسحاق ڈار نے نیویارک میں اقوام متحدہ کی سلامتی کونسل کے اجلاس میں شرکت کی جہاں انہوں نے مشرق وسطیٰ میں کشیدگی کم کرنے اور سفارتی حل پر زور دیا۔ اپنے خطاب میں انہوں نے کہا کہ ایران اور امریکا کے درمیان جاری تنازع کا پرامن حل خطے اور دنیا کے امن کیلئے ضروری ہے۔
نیویارک میں قیام کے دوران وزیر خارجہ نے اقوام متحدہ کے سیکرٹری جنرل انتونیو گوتریس سمیت دیگر عالمی رہنماؤں سے بھی ملاقاتیں کیں۔ ان ملاقاتوں میں افغانستان، فلسطین، جنوبی ایشیا اور سلامتی کونسل میں اصلاحات جیسے اہم امور پر گفتگو ہوئی۔
تجزیہ کاروں کے مطابق اسحاق ڈار امریکا دورہ ایسے وقت میں ہو رہا ہے جب پاکستان خطے میں سفارتی رابطوں اور ایران امریکا کشیدگی کم کرنے کی کوششوں میں فعال کردار ادا کر رہا ہے۔ حالیہ مہینوں میں پاکستان اور امریکا کے تعلقات میں بھی دوبارہ بہتری دیکھی گئی ہے۔
