اسلام آباد(نیوز ڈیسک)دبئی کا سفر کرنے کے خواہشمند افراد کے لیے ایک بڑی خوشخبری سامنے آئی ہے جہاں معروف فضائی کمپنی ایمریٹس ایئرلائن نے موسم گرما کے دوران مسافروں کے لیے ایک خصوصی آفر کا اعلان کیا ہے۔
پیشکش کے تحت دبئی آنے والے اہل مسافروں کو ریٹرن ٹکٹ بک کروانے پر مفت ہوٹل قیام کی سہولت فراہم کی جائے گی جس سے سیاحوں کے لیے دبئی کا سفر مزید پرکشش اور یادگار بن جائے گا۔
تفصیلات کے مطابق ایمریٹس ایئرلائن نے موسم گرما کی تعطیلات کے موقع پر یہ خصوصی مہم شروع کی ہے، جس کے تحت مخصوص شرائط پوری کرنے والے مسافروں کو دبئی کے معروف ہوٹل میں مفت قیام کی سہولت دی جائے گی۔ اس آفر کا مقصد دبئی کو سیاحوں کے لیے ایک بہترین تفریحی مقام کے طور پر مزید فروغ دینا اور مسافروں کو شہر میں قیام کے دوران بہتر تجربہ فراہم کرنا ہے۔
رپورٹس کے مطابق 22 جون سے 12 جولائی کے درمیان فرسٹ کلاس یا بزنس کلاس میں ریٹرن ٹکٹ بک کروانے والے مسافر دبئی کے مشہور ہوٹل جے ڈبلیو میریٹ مارکیس میں دو راتوں کے مفت قیام سے فائدہ اٹھا سکیں گے۔ اسی طرح پریمیئم اکانومی اور اکانومی کلاس میں سفر کرنے والے اہل مسافروں کو ایک رات کے مفت قیام کی سہولت فراہم کی جائے گی۔
یہ پیشکش صرف ان مسافروں کے لیے دستیاب ہوگی جن کے ٹکٹ دبئی کے لیے ہوں یا جن کا دبئی میں 24 گھنٹے سے زیادہ کا اسٹاپ اوور شامل ہو۔ اس کے علاوہ سفر کی تاریخ 25 جون سے 30 ستمبر 2026 کے درمیان ہونا ضروری ہے تاکہ مسافر اس سہولت سے فائدہ اٹھا سکیں۔
جے ڈبلیو میریٹ مارکیس دبئی کے مرکزی علاقے میں واقع ایک معروف ہوٹل ہے جہاں مہمانوں کو جدید سہولیات، مختلف ریسٹورنٹس، اسپا، جم اور خوبصورت نظاروں کے ساتھ آؤٹ ڈور پول جیسی سہولتیں دستیاب ہیں۔
ایمریٹس ایئرلائن کے نائب صدر اور چیف کمرشل افسر عدنان کاظم نے کہا کہ دبئی موسم گرما کی چھٹیوں کے لیے ایک بہترین مقام ہے جہاں سیاح تفریح، خریداری، کھانے پینے اور فیملی سرگرمیوں سے بھرپور لطف اٹھا سکتے ہیں ، انہوں نے کہا کہ مفت ہوٹل قیام کی سہولت مسافروں کو دبئی کو مزید بہتر انداز میں دیکھنے اور اس شہر کے مختلف تجربات سے لطف اندوز ہونے کا موقع فراہم کرے گی۔
مسافر اس خصوصی مہم سے فائدہ اٹھانے کے لیے متعلقہ مقامات پر اپنا شناختی کارڈ اور فزیکل یا ڈیجیٹل بورڈنگ پاس دکھا سکتے ہیں۔ توقع کی جا رہی ہے کہ اس آفر سے دبئی جانے والے سیاحوں کی دلچسپی میں اضافہ ہوگا اور موسم گرما کے دوران شہر میں سیاحت کو مزید فروغ ملے گا۔
مزید پڑھیں۔دورہ انگلینڈ: 15 سالہ سوریا ونشی پر بھارتی ٹیم کے ساتھ رہنے پر پابندی لگ گئی
