اسلام آباد: نجی حج عازمین فیڈبیک کے حصول کے لیے وزارت مذہبی امور نے گزشتہ سال نجی حج اسکیم کے تحت فریضہ حج ادا کرنے والے عازمین سے شکایات، اعتراضات اور تجاویز طلب کر لی ہیں تاکہ نجی حج کمپنیوں کی کارکردگی کا مؤثر جائزہ لیا جا سکے۔
وزارت مذہبی امور کی جانب سے جاری بیان کے مطابق نجی حج آپریٹرز کے ذریعے حج کرنے والے تمام عازمین 20 جولائی تک اپنی شکایات یا تجاویز جمع کرا سکتے ہیں۔ وزارت کا کہنا ہے کہ موصول ہونے والی معلومات کی روشنی میں کمپنیوں کی کارکردگی کا جائزہ لیا جائے گا۔
ترجمان وزارت مذہبی امور نے بتایا کہ تمام شکایات تحریری، دستخط شدہ اور متعلقہ ثبوتوں یا دستاویزی شواہد کے ساتھ ارسال کی جائیں تاکہ ان کا مقررہ طریقہ کار کے مطابق جائزہ لیا جا سکے۔
بیان میں کہا گیا ہے کہ آئندہ نجی حج کمپنیوں کے لائسنس کی تجدید یا منسوخی کا فیصلہ ان کی کارکردگی کی بنیاد پر کیا جائے گا، جبکہ موصول ہونے والی شکایات اور تجاویز کو بھی اس عمل میں شامل کیا جائے گا۔
وزارت مذہبی امور کے مطابق نجی حج کمپنیوں سے پانچ فیصد پرفارمنس گارنٹی بھی حاصل کی گئی ہے تاکہ عازمین کو بہتر سہولیات کی فراہمی یقینی بنائی جا سکے۔
وزارت نے تمام عازمین کو ہدایت کی ہے کہ وہ اپنی شکایات یا تجاویز 20 جولائی تک ڈاک یا ای میل کے ذریعے ارسال کریں۔ مقررہ تاریخ کے بعد موصول ہونے والی درخواستوں پر غور نہیں کیا جائے گا۔
حکام کا کہنا ہے کہ نجی حج عازمین فیڈبیک حاصل کرنے کا مقصد نجی حج اسکیم میں شفافیت، احتساب اور خدمات کے معیار کو مزید بہتر بنانا ہے تاکہ آئندہ حج آپریشن میں عازمین کو بہتر سہولیات فراہم کی جا سکیں۔
