کوئٹہ: بلوچستان مون سون الرٹ جاری کرتے ہوئے محکمہ موسمیات نے خبردار کیا ہے کہ صوبے میں مون سون کے دوسرے اسپیل کے تحت 11 جولائی سے بارشوں کا نیا سلسلہ شروع ہوگا، جو 12 جولائی تک جاری رہنے کا امکان ہے۔ پی ڈی ایم اے نے بھی ممکنہ خراب موسمی صورتحال کے پیش نظر ضلعی انتظامیہ اور متعلقہ اداروں کو ہائی الرٹ رہنے کی ہدایت جاری کر دی ہے۔
محکمہ موسمیات کے مطابق ژوب، شیرانی، دکی، کوہلو اور ہرنائی میں موسلا دھار بارش متوقع ہے، جبکہ لورالائی، بارکھان، موسیٰ خیل، ڈیرہ بگٹی اور خضدار سمیت مختلف اضلاع میں گرج چمک کے ساتھ بارش کا امکان ظاہر کیا گیا ہے۔
بلوچستان مون سون الرٹ کے مطابق شدید بارشوں کے باعث ندی نالوں میں طغیانی، مقامی سیلاب اور پہاڑی علاقوں میں لینڈ سلائیڈنگ کا خطرہ بھی موجود ہے، جس کے باعث نشیبی علاقوں میں احتیاطی تدابیر اختیار کرنے کی ضرورت پر زور دیا گیا ہے۔
پی ڈی ایم اے نے تمام متاثرہ اضلاع کی ضلعی انتظامیہ، ریسکیو اداروں اور متعلقہ محکموں کو ہدایت کی ہے کہ ہنگامی صورتحال سے نمٹنے کے لیے پیشگی انتظامات مکمل رکھے جائیں تاکہ کسی بھی ناخوشگوار واقعے کی صورت میں فوری امدادی کارروائیاں کی جا سکیں۔
ادارے نے شہریوں سے اپیل کی ہے کہ بارشوں کے دوران غیر ضروری سفر سے گریز کریں، خستہ حال عمارتوں میں رہائش اختیار نہ کریں اور پکنک پوائنٹس، برساتی ندی نالوں اور آبی گزرگاہوں کا رخ کرنے سے اجتناب کریں۔
حکام کا کہنا ہے کہ موسم کی صورتحال پر مسلسل نظر رکھی جا رہی ہے اور عوام کو کسی بھی نئی پیش رفت سے بروقت آگاہ کیا جائے گا۔
