اسلام آباد: ہفتہ وار مہنگائی رپورٹ جاری کر دی گئی ہے، جس میں بعض اشیائے ضروریہ کی قیمتوں میں کمی جبکہ متعدد اشیاء مہنگی ہونے کا انکشاف کیا گیا ہے۔ وفاقی ادارہ شماریات کے مطابق حالیہ ہفتے کے دوران پیٹرول، ڈیزل، ایل پی جی اور چینی کی قیمتوں میں کمی ریکارڈ کی گئی، تاہم مجموعی طور پر 22 اشیائے ضروریہ مہنگی ہوئیں۔
ادارہ شماریات کے مطابق ایک ہفتے کے دوران 22 اشیاء کی قیمتوں میں اضافہ، 8 اشیاء کی قیمتوں میں کمی جبکہ 21 اشیاء کی قیمتیں مستحکم رہیں۔
ہفتہ وار مہنگائی رپورٹ کے مطابق آلو کی قیمت میں 3.94 فیصد جبکہ چکن کی قیمت میں 3.70 فیصد اضافہ ریکارڈ کیا گیا۔ اسی طرح پیاز 3.54 فیصد اور آٹے کی قیمت 1.61 فیصد بڑھ گئی۔
رپورٹ میں بتایا گیا ہے کہ انڈے، بیف اور تازہ دودھ سمیت دیگر کئی اشیائے خور و نوش کی قیمتوں میں بھی اضافہ دیکھنے میں آیا، جس سے صارفین پر مہنگائی کا بوجھ برقرار رہا۔
دوسری جانب بعض اشیاء کی قیمتوں میں کمی بھی ریکارڈ کی گئی۔ ٹماٹر کی قیمت میں 23.30 فیصد نمایاں کمی ہوئی، جبکہ دال مونگ 2.15 فیصد اور دال مسور 0.52 فیصد سستی ہوئی۔
ادارہ شماریات کے مطابق گزشتہ ہفتے کے دوران پیٹرول، ڈیزل، ایل پی جی اور چینی کی قیمتوں میں بھی کمی ریکارڈ کی گئی، جس سے صارفین کو جزوی ریلیف ملا۔
ماہرین کا کہنا ہے کہ اشیائے ضروریہ کی قیمتوں میں اتار چڑھاؤ طلب و رسد، موسمی حالات اور عالمی منڈی کی صورتحال سے بھی متاثر ہوتا ہے، اس لیے آنے والے ہفتوں میں قیمتوں میں مزید تبدیلی کا امکان موجود ہے۔
