تہران: آبنائے ہرمز کے معاملے پر ایران نے ایک بار پھر سخت مؤقف اختیار کرتے ہوئے واضح کیا ہے کہ وہ اس اہم بحری گزرگاہ پر اپنا کنٹرول کسی بھی صورت میں نہیں چھوڑے گا۔ ایرانی قیادت نے امریکی مداخلت کے خلاف بھی سخت ردعمل کی وارننگ دی ہے۔
ایران کے سپریم لیڈر کے سینئر مشیر محمد مخبر نے کہا کہ تہران اپنی اسٹریٹجک پوزیشن اور قومی مفادات کے تحفظ کے لیے آبنائے ہرمز پر کنٹرول برقرار رکھے گا۔ ان کے مطابق یہ بحری گزرگاہ ایران کی سلامتی اور تجارتی مفادات کے لیے انتہائی اہم حیثیت رکھتی ہے۔
محمد مخبر نے کہا کہ ایران مستقبل میں اپنے تجارتی اور بحری جہازوں کی آزادانہ آمدورفت یقینی بنانا چاہتا ہے اور کسی بھی ملک یا طاقت کو اس راستے پر اپنی شرائط مسلط کرنے کی اجازت نہیں دی جائے گی۔
انہوں نے مزید کہا کہ آبنائے ہرمز کی اسٹریٹجک اہمیت غیر معمولی ہے اور ایران اس مقام پر حاصل ہونے والی اپنی پوزیشن اور مفادات سے کسی بھی قیمت پر دستبردار نہیں ہوگا۔
یہ بیان ایسے وقت میں سامنے آیا ہے جب خطے میں ایران اور امریکا کے درمیان کشیدگی میں اضافہ دیکھنے میں آ رہا ہے اور آبنائے ہرمز کی سکیورٹی عالمی توجہ کا مرکز بنی ہوئی ہے۔
دوسری جانب ایران کی مشترکہ فوجی کمانڈ نے بھی خبردار کیا ہے کہ آبنائے ہرمز کے انتظام یا سکیورٹی میں کسی بھی غیر مجاز امریکی مداخلت کو برداشت نہیں کیا جائے گا۔ فوجی حکام کے مطابق ایران اپنی اجازت کے بغیر کسی بھی اقدام کا بھرپور جواب دینے کی صلاحیت رکھتا ہے۔
ایرانی فوجی قیادت نے علاقائی ممالک کو بھی متنبہ کیا کہ اگر کسی نے ایران کے خلاف فوجی کارروائی یا تعاون میں حصہ لیا تو اسے بھی اس تنازع کا حصہ تصور کیا جا سکتا ہے۔ حکام کا کہنا ہے کہ موجودہ کشیدگی میں مزید اضافہ پورے خطے کی سلامتی پر اثر انداز ہو سکتا ہے۔
