کراچی(نیوز ڈیسک)سوشل میڈیا پر ایک انوکھی اور متنازعہ شادی کی تقریب کی تصاویر اور ویڈیوز گردش کر رہی ہیں جو کراچی کی جناح یونیورسٹی برائے خواتین میں منعقد ہوئی۔ یہ تقریب یونیورسٹی کے چانسلر کی بیٹی کی شادی کے حوالے سے تھی، اور اس نے سوشل میڈیا پر ہلچل مچا دی ہے۔ یونیورسٹی کو اس دن دلہن کی طرح سجایا گیا تھا، جہاں رنگ برنگے برقی قمقمے اور شاندار سجاوٹ سے ماحول کو دلکش بنایا گیا۔
جناح یونیورسٹی، جو 1998 میں قائم ہوئی اور پاکستان کی پہلی ویمن یونیورسٹی کے طور پر جانی جاتی ہے، میں اس قسم کی تقریب کا انعقاد طلبہ و طالبات اور عوام کے لیے ایک غیر متوقع منظر تھا۔ یونیورسٹی میں ہمیشہ مردوں کے داخلے پر پابندی ہوتی ہے، لیکن اس دن یہ منظر نامہ بالکل مختلف تھا۔
سوشل میڈیا پر وائرل ہونے والی ویڈیوز اور تصاویر میں سب سے پہلے یونیورسٹی کی موجودہ حالت دکھائی گئی، اور پھر ایک شاندار ٹرانزیشن کے ذریعے اسے ایک خوبصورت شادی ہال میں تبدیل ہوتے ہوئے دکھایا گیا، جو وہاں کی طالبات کے لیے حیرت کا باعث تھا۔
7 نومبر کو مہندی کی تقریب کے دوران رنگین محافل اور رقص کا منظر تھا، جہاں انڈین گانوں پر ڈانس اور خوشی کا سماں تھا۔ اس کے علاوہ، شادی کے دن ہزاروں روپے کی سجاوٹ اور پھولوں کی خوشبو نے ماحول کو اور بھی دلکش بنا دیا تھا۔ غیر ملکی مہمانوں کے لیے یونیورسٹی کے کلاس رومز کو گیسٹ رومز میں تبدیل کیا گیا تھا اور عملہ ان کی خدمت میں مشغول تھا۔
تاہم، یونیورسٹی میں اس تقریب کے انعقاد پر طلبہ میں شدید غم و غصہ پایا گیا۔ ایک طالبہ نے اس پر ناراضگی کا اظہار کرتے ہوئے کہا، “ہمیں تو ایک قوالی نائٹ بھی کرنے کی اجازت نہیں دی جاتی، اور اب یہاں انڈین گانوں پر ڈانس ہو رہا ہے۔” طلبہ نے یہ بھی شکایت کی کہ انہیں امتحانات کی تیاری کے لیے چھٹیاں دے کر مزید کام کرنے کو کہا گیا، جب کہ یونیورسٹی میں ایک طرف جشن کا ماحول تھا۔
واضح رہے کہ یونیورسٹی نے یکم نومبر سے 10 نومبر تک سرمائی تعطیلات کا اعلان کر رکھا تھا، جس کے دوران کسی غیر نصابی سرگرمی کی اجازت دینے کے لیے خاص شرائط رکھی گئی تھیں۔
مزیدپڑھیں:چند روز میں خود مکمل تیاری کے ساتھ مارچ کی تاریخ دوں گا، عمران خان
