گھوٹکی (ویب ڈیسک)ماڑی انرجیز نے سندھ کے شہر ڈھرکی سے تیل اور گیس کی دریافت کا اعلان کرتے ہوئے ایک اہم کامیابی حاصل کی ہے۔ کمپنی کی جانب سے جاری کردہ اعلامیے میں بتایا گیا ہے کہ ضلع گھوٹکی کے ڈھرکی علاقے میں ماڑی غزیج سی ایف بی ون ایکسپلوریشن ویل سے تیل اور گیس کا بڑا ذخیرہ دریافت ہوا ہے۔
اعلامیے کے مطابق، ماڑی انرجیز ماڑی ڈیولپمنٹ اینڈ پروڈکشن لیز کی 100 فیصد حقوق کے ساتھ اس آپریشن کی ذمہ دار کمپنی ہے۔ دریافت شدہ کنویں کو خاص طور پر تیل سے بھرپور زونز کو ہدف بنا کر کھودا گیا تھا، جس کے دوران کنویں سے روزانہ 305 بیرل تیل اور 30 لاکھ مکعب فٹ گیس حاصل ہوئی ہے۔
ماڑی انرجیز کے حکام نے کہا ہے کہ یہ دریافت ماڑی فیلڈ میں پاکستان کے سب سے بڑے گیس ذخیرے کو چلانے کے سلسلے میں ایک اہم سنگ میل ہے۔ کمپنی ملک کی گیس کی پیداوار میں تقریباً 30 فیصد مارکیٹ شیئر کے ساتھ سب سے بڑی کمپنی کے طور پر کام کر رہی ہے۔
یہ دریافت سندھ کے توانائی کے شعبے کے لیے نہ صرف خوش آئند ہے بلکہ ملکی توانائی کے بحران میں کمی لانے میں بھی مددگار ثابت ہوگی۔ ماڑی انرجیز کی اس کامیابی سے امید کی جا رہی ہے کہ آئندہ بھی ملک کے توانائی کے وسائل کو مزید بڑھانے کے لیے اہم اقدامات کیے جائیں گے۔
مزید پڑھیں : تعلیمی اداروں کے حوالے سے بڑی خبر ٔ تفصیلات جانیئے
