کراچی ایئرپورٹ پر غیر ملکی ایئرلائن کی فضائی میزبان کو آف لوڈ کر دیا گیا جب فیڈرل انویسٹی گیشن ایجنسی نے سخت چیکنگ شروع کی۔
امیگریشن حکام نے خاتون کو سعودی عرب روانگی سے قبل مشکوک قرار دیا۔ وہ پاکستانی پاسپورٹ پر سعودی ایگزٹ ری انٹری ویزا کے ساتھ سفر کر رہی تھیں۔
دستاویزات کی جانچ کے بعد سامان کی مکمل تلاشی لی گئی۔ تلاشی کے دوران 26 سگریٹ کے بنڈل، نو پیکٹ ادب گٹکا، 24 ساشے رجنی تمباکو اور چھالیہ کے تین شاپنگ بیگ برآمد ہوئے۔
خاتون نے بیان دیا کہ وہ 2014 سے سعودی ایئرلائن میں فضائی میزبان کے طور پر خدمات انجام دے رہی ہیں۔ ان کا کہنا تھا کہ ملازمت کے باعث انہیں اکثر بیرون ملک سفر کرنا پڑتا ہے۔
امیگریشن ذرائع کے مطابق انہوں نے اعتراف کیا کہ وہ گزشتہ چھ ماہ سے ممنوعہ اور کمرشل سامان لے جا رہی تھیں۔ انہوں نے یہ بھی بتایا کہ 10 سے 12 دیگر عملے کے ارکان بھی اس عمل میں شامل تھے۔
تحقیقات کے دوران مبینہ طور پر انہوں نے مختلف محکموں اور ایئرلائن عملے کو رشوت دے کر سامان کلیئر کروانے کا اعتراف کیا۔
حکام نے انہیں جہاز سے اتار کر ایف آئی اے اینٹی کرپشن سرکل کراچی کے حوالے کر دیا۔ مزید قانونی کارروائی جاری ہے۔
