کوئٹہ: کوئٹہ میں پانچ بچوں کی ولادت کا منفرد واقعہ سامنے آیا ہے، جہاں ایک نجی اسپتال میں خاتون نے بیک وقت پانچ بچوں کو جنم دیا۔ اسپتال انتظامیہ کے مطابق والدہ اور تمام نومولود خیریت سے ہیں اور انہیں خصوصی طبی نگرانی میں رکھا گیا ہے۔
اسپتال انتظامیہ نے بتایا کہ پیدا ہونے والے پانچ بچوں میں تین بچیاں اور دو بچے شامل ہیں۔ تمام نومولودوں کی پیدائش کامیابی سے ہوئی، جبکہ ماں کی حالت بھی تسلی بخش ہے۔
ڈاکٹروں کے مطابق بیک وقت پانچ بچوں کی پیدائش ایک غیر معمولی طبی واقعہ ہوتا ہے، اس لیے والدہ اور بچوں کو احتیاطی طور پر خصوصی نگہداشت یونٹ (NICU) میں رکھا گیا ہے تاکہ ان کی صحت کی مسلسل نگرانی کی جا سکے۔
کوئٹہ میں پانچ بچوں کی ولادت کی خبر سامنے آنے کے بعد اہل خانہ اور عزیز و اقارب میں خوشی کی لہر دوڑ گئی۔ اسپتال ذرائع کے مطابق والدین اس غیر معمولی نعمت پر بے حد خوش ہیں۔
معلوم ہوا ہے کہ کوئٹہ سے تعلق رکھنے والے اس جوڑے کے پہلے ہی تین بچے موجود تھے، جبکہ پانچ نئے بچوں کی پیدائش کے بعد ان کے خاندان میں بچوں کی مجموعی تعداد آٹھ ہو گئی ہے۔
ماہرین صحت کے مطابق ایک ہی وقت میں متعدد بچوں کی پیدائش کے کیسز نسبتاً کم دیکھنے میں آتے ہیں اور ایسے بچوں کو پیدائش کے بعد خصوصی طبی نگہداشت کی ضرورت ہوتی ہے تاکہ ان کی نشوونما اور صحت کو یقینی بنایا جا سکے۔
