بین الاقوامی میڈیا رپورٹس کے مطابق FIFA World Cup Final کے ٹکٹس کی قیمتیں ریکارڈ سطح تک پہنچ گئی ہیں، جہاں محض چار نشستوں کا ایک سیٹ کروڑوں پاکستانی روپے کے برابر فروخت کے لیے پیش کیا جا رہا ہے۔
اطلاعات کے مطابق فیفا کے آفیشل ری سیل پلیٹ فارم پر فائنل کے 4 ٹکٹس کی قیمت تقریباً 1.7 ملین پاؤنڈ تک جا پہنچی ہے، جو پاکستانی کرنسی میں ایک غیر معمولی اور خطیر رقم بنتی ہے۔ یہ ہائی پروفائل مقابلہ 19 جولائی کو MetLife Stadium میں کھیلا جائے گا۔
رپورٹس کے مطابق یہ ٹکٹس اسٹیڈیم کے لوئر ٹیئر میں گول پوسٹ کے پیچھے واقع نشستوں پر مشتمل ہیں، جنہیں شائقین کے لیے بہترین ویو کے باعث پریمیم کیٹیگری میں رکھا گیا ہے۔ دلچسپ امر یہ ہے کہ اگرچہ فیفا خود ٹکٹس کی قیمت مقرر نہیں کرتی، تاہم ہر ری سیل پر تقریباً 15 فیصد کمیشن ضرور وصول کرتی ہے۔
ماہرین کے مطابق اگر یہ ٹکٹس اسی قیمت پر فروخت ہو جاتے ہیں تو فیفا کو صرف کمیشن کی مد میں تقریباً 2 لاکھ پاؤنڈ سے زائد آمدن حاصل ہو سکتی ہے۔
مزید برآں، کیٹیگری ون کے ٹکٹس کی قیمت 11,920 پاؤنڈ سے شروع ہو کر لاکھوں پاؤنڈ تک پہنچ چکی ہے، جبکہ نسبتاً کم درجے کے ٹکٹس بھی 8 ہزار پاؤنڈ سے کم میں دستیاب نہیں۔
تجزیہ کاروں کا کہنا ہے کہ ٹکٹوں کی ان بلند قیمتوں نے عام شائقین کے لیے فائنل میچ کو اسٹیڈیم میں دیکھنے کا خواب تقریباً ناممکن بنا دیا ہے، اور اب یہ ایونٹ زیادہ تر امیر طبقے تک محدود ہوتا جا رہا ہے۔
