اسلام آباد(نیوز ڈیسک) ٹک ٹاک نے پاکستانی صارفین کے لیے نئے فیچرز متعارف کرانے کا اعلان کیا ہے تاکہ ان کے تحفظ کو بڑھایا جا سکے اور ان کے مواد کی رسائی کو بہتر بنایا جا سکے۔
کمپنی کے مطابق، ان فیچرز کی مدد سے صارفین اپنے مداحوں سے زیادہ مؤثر طریقے سے رابطہ کر سکیں گے اور انہیں پلیٹ فارم پر بہتر کنٹرول حاصل ہوگا۔ ان میں سے ایک فیچر کریٹیر کیئر موڈ ہے، جس کے ذریعے صارفین اپنے کمنٹس کو منظم کر سکیں گے۔ اس فیچر میں توہین آمیز یا ہراساں کرنے والے کمنٹس خودکار طور پر چھپ جائیں گے، اور وہ کمنٹس بھی فلٹر ہوں گے جو پہلے رپورٹ یا ڈیلیٹ کیے جا چکے ہوں۔
یہ فیچر آرٹیفیشل انٹیلی جنس (AI) کی مدد سے کام کرے گا تاکہ غیر مناسب کمنٹس کو خود بخود ہٹایا جا سکے۔
دوسرا فیچر کانٹینٹ چیک لائٹ ہے، جو صارفین کو ان کی ویڈیوز کی رسائی کی جانچ کرنے کا موقع دے گا۔ یہ فیچر ٹک ٹاک اسٹوڈیو کے ویب ورژن میں دستیاب ہوگا، جس سے صارفین جان سکیں گے کہ ان کی ویڈیوز فار یو فیڈ میں دکھائی دیں گی یا نہیں۔ اس کے ذریعے وہ پوسٹ کرنے سے پہلے اپنے مواد میں ایسی تبدیلیاں کر سکتے ہیں جو کمیونٹی گائیڈ لائنز کے مطابق ہوں۔
اس کے علاوہ، ٹک ٹاک نے کریٹیر ان باکس بھی متعارف کرایا ہے، جو صارفین کو اپنے مداحوں سے فوری رابطے کے لیے نئے ٹولز فراہم کرے گا۔ اس میں اسٹار کیے گئے پیغامات کے لیے الگ فولڈرز اور فوری جوابات کے ٹیمپلیٹس شامل ہوں گے۔
مزیدپڑھیں:روسی ہائپر سانک میزائل سے لیس مِگ 31 اغوا کرنے کی کوشش ناکام، یوکرینی انٹیلی جنس اور ایف 16 بیس تباہ
