اسلام آباد(نیوز ڈیسک) وفاقی وزیر شزا فاطمہ نے سست انٹرنیٹ سے پریشان صارفین کو بڑی خوشخبری سناتے ہوئے کہا تیز ترین انٹرنیٹ سروس کی بحالی کیلئے اقدامات کیے جا رہے ہیں۔
تفصیلات کے مطابق وفاقی وزیرآئی ٹی شزا فاطمہ خواجہ نے براق اسپیس کیمپ کے کامیاب اختتام پر خطاب کرتے ہوئے نوجوانوں کی حوصلہ افزائی کی اور کہا کیمپ 29 دسمبر 2025 کو شروع ہوا تھا اور اس میں 40 شارٹ لسٹ طلبہ نے تربیت کامیابی کے ساتھ مکمل کی۔
شزا فاطمہ کا کہنا تھا کہ نوجوان ہمارے ملک کا قیمتی سرمایہ اور مستقبل ہیں اور انہیں ماحولیاتی تبدیلیوں اور ڈیجیٹل دور کے چیلنجز کا مقابلہ کرنے کے لیے تیار کرنا ہوگا۔
انہوں نے کہا کہ نوجوانوں نے معرکہ حق میں سائبرسیکیورٹی کے شعبے میں اہم کردار ادا کیا اور ملک میں ٹیلنٹ کی کوئی کمی نہیں ہے۔
وفاقی وزیر نے کہا کہ حکومت نوجوانوں کو درست سمت میں گامزن کرنے کے لیے مختلف اقدامات کر رہی ہے اور ڈیجیٹل پاکستان کے ذریعے لوگوں کو ڈیٹا اور جدید ٹیکنالوجی تک آسان رسائی فراہم کی جائے گی۔
انہوں نے مزید کہا کہ تیز ترین انٹرنیٹ سروس کی بحالی کے لیے اقدامات کیے جا رہے ہیں اور کچھ ماہ میں فائیوجی سروس لانچ کی جائے گی۔
شزا فاطمہ خواجہ نے فری لانسنگ کے شعبے میں 91 فیصد اضافہ ہونے کا ذکر کرتے ہوئے کہا کہ حکومت نوجوانوں کو مختلف شعبوں میں تربیت دے رہی ہے تاکہ وہ ملک کی ترقی میں کردار ادا کریں۔
مزیدپڑھیں:درد سے نجات کے لیے استعمال ہونے والے یہ 3 دوائیں نہ خریدیں ! شہریوں کے لئے الرٹ جاری
