پاکستان میں چاندی کی قیمت میں مسلسل اضافہ، نئی بلند سطح پر پہنچ گئی

اسلام آباد(اوصاف نیوز)پاکستان میں چاندی کی قیمتوں میں زبردست تیزی کا سلسلہ جاری ہے اور آج چاندی نے مقامی سطح پر نئی بلند ترین سطح کو چھو لیا۔ آج چاندی کی فی تولہ قیمت 11 ہزار 640 روپے ریکارڈ کی گئی، جو عالمی منڈی میں قیمتی دھاتوں میں تیزی اور سونے کے ساتھ مضبوط تعلق کا نتیجہ ہے۔

مارکیٹ ذرائع کے مطابق حالیہ دنوں میں فی تولہ چاندی کی قیمت میں 212 روپے کا اضافہ ہوا، جبکہ 10 گرام چاندی کی قیمت بڑھ کر 9 ہزار 979 روپے ہو گئی ہے۔ گزشتہ ایک ہفتے کے دوران پاکستانی روپے کے حساب سے چاندی میں تقریباً 14 فیصد اضافہ دیکھا گیا ہے، جو دیگر کئی سرمایہ کاری کے ذرائع سے کہیں زیادہ ہے۔

عالمی سطح پر چاندی کی قیمت 111 ڈالر فی اونس سے تجاوز کر چکی ہے، جس کا براہ راست اثر مقامی منڈی پر پڑ رہا ہے۔ سونے کی قیمتیں بھی ریکارڈ سطح کے قریب رہنے سے قیمتی دھاتوں کو محفوظ سرمایہ کاری سمجھا جا رہا ہے، جس کے باعث سرمایہ کار سونے کے ساتھ ساتھ چاندی کی جانب بھی تیزی سے متوجہ ہو رہے ہیں۔

ایک گرام چاندی:  997.9 روپے

10 گرام چاندی:  9 ہزار 979 روپے

ایک تولہ چاندی:  11 ہزار 640 روپے

 
مزید پڑھیں: پاکستان میں ڈیزل اور پیٹرول کی قیمت