حیدرآباد(اوصاف نیوز)بھارت تلنگانہ کے بھونگیر ضلع میں ایک دلخراش حادثہ رونما ہوا، چلتی ٹرین سے پھسل کر گرنے کے باعث ایک نو بیاہتا جوڑا موقع پر جاں بحق ہوگیا۔
بھارتی میڈیا رپورٹس کے مطابق مقامی افراد کا کہنا ہے کہ ٹرین سے حادثاتی طور پر گرنے سے یہ المناک واقعہ پیش آیا۔ ریلوے پولیس نے مرنے والوں کی شناخت آندھرا پردیش کے سمہاچلم (25) اور انکوارم گاؤں کی رہنے والی بھوانی (19) کے طور پر کی ہے۔
رپورٹس کے مطابق نو بیاہتا جوڑا دو ماہ قبل ہی شادی کے بندھن میں بندھا تھا، سمہاچلم حیدرآباد کے مضافاتی علاقے میں ایک کیمیکل فیکٹری میں اپنے رشتہ داروں کے ساتھ کام کر رہا تھا۔ جوڑا اپنے گھر جانے کے لئے جمعرات کی رات سکندرآباد سے ٹرین میں سوار ہوا تھا۔
ٹرین کے ونگاپلی ریلوے اسٹیشن سے آگے بڑھنے کے بعد جب دونوں دروازے کے قریب کھڑے تھے، اسی دوران توازن بگڑنے سے حادثاتی طور پر نیچے گر پڑے۔ شدید چوٹیں آنے کے باعث دونوں موقع پر ہی اپنی جان گنوا بیٹھے۔
رپورٹس کے مطابق ریلوے پولیس نے اس سلسلے میں مقدمہ درج کر کے تحقیقات شروع کر دی ہیں۔ پوسٹ مارٹم کے بعد دونوں کی نعشیں ان کے آبائی علاقوں میں منتقل کردی گئیں۔
مزید پڑھیں:اسلام آباد سمیت ملک کے مختلف علاقوں میں زلزلہ
