ڈھاکہ (انٹرنیشنل ڈیسک) بنگلہ دیش کے ضلع شیرپور میں انتخابی مہم کے دوران بنگلہ دیش نیشنلسٹ پارٹی (بی این پی) اور جماعت اسلامی کے کارکنوں کے درمیان شدید تصادم میں جماعت اسلامی کے ایک سینئر رہنما ہلاک ہو گئے۔
میڈیا رپورٹس کے مطابق ضلع شیرپور کے علاقے جھنائی گٹی میں واقعہ کے دوران جماعت اسلامی کے مقامی رہنما مولانا رضا الکریم شدید زخمی ہوگئے۔
یہ واقعہ اس وقت پیش آیا جب مقامی انتظامیہ حلقہ شیرپور 3 میں امیدواروں کے انتخابی منشور پڑھنے کی تقریب کا اہتمام کر رہی تھی۔ تقریب کے دوران نشستوں کے معاملے پر بی این پی اور جماعت اسلامی کے حامیوں کے درمیان تلخ کلامی ہوئی جو ہاتھا پائی اور پرتشدد تصادم میں بدل گئی۔
عینی شاہدین کے مطابق تصادم کے دوران سینکڑوں کرسیاں ٹوٹ گئیں جبکہ متعدد موٹر سائیکلوں کو بھی آگ لگ گئی یا شدید نقصان پہنچا۔ جھڑپوں میں دونوں جماعتوں کے کم از کم 30 کارکن زخمی ہوئے جنہیں قریبی اسپتالوں میں منتقل کردیا گیا۔
پولیس نے کہا کہ صورت حال پر قابو پانے کے لیے اضافی دستے تعینات کیے گئے، لیکن بھیڑ کو منتشر کرنے میں وقت لگا۔
مولانا رضا الکریم جماعت اسلامی کی سری بردی اپجلہ شاخ کے سیکرٹری تھے اور فتح پور فاضل مدرسہ میں عربی کے لیکچرار بھی تھے۔ اسے تشویشناک حالت میں میمن سنگھ میڈیکل کالج ہسپتال لے جایا جا رہا تھا، لیکن وہ راستے میں ہی دم توڑ گیا۔
پولیس کے مطابق رات 9 بج کر 35 منٹ پر اسپتال پہنچنے پر انہیں مردہ قرار دیا گیا، جس کے بعد ان کی لاش کو پوسٹ مارٹم کے لیے بھیج دیا گیا۔
مزید پڑھیں:بی آئی ایس پی کی رجسٹریشن کا باقاعدہ آغاز،جانیں اہم تفصیلات
