کراچی (نیوز ڈیسک) سندھ ہائی کورٹ نے ریٹائرڈ ملازمین کی مدت ملازمت کے تنازع پر اہم فیصلہ سناتے ہوئے ڈیلی ویجز ملازمین کو بھی پنشن کا حقدار قرار دے دیا۔ سندھ ہائی کورٹ نے سول ایوی ایشن اتھارٹی (سی اے اے) کے ریٹائرڈ ملازمین کی مدت ملازمت کے تنازع پر تاریخی فیصلہ سناتے ہوئے حکم دیا ہے کہ یومیہ اجرت اور عارضی بنیادوں پر کی جانے والی سروس کو بھی پنشن میں شمار کیا جائے۔
عدالت نے اس سلسلے میں سی اے اے کے جاری کردہ سابقہ دفتری احکامات کو کالعدم قرار دیا ہے۔ جسٹس عدنان الکریم میمن کی سربراہی میں دو رکنی بنچ نے درخواستوں کی سماعت کی۔ وکیل نے موقف اختیار کیا کہ ملازمین نے 1998 سے 2001 کے درمیان یومیہ اجرت پر کام کرنا شروع کیا اور انہیں 2009 میں مستقل کر دیا گیا تاہم ریٹائرمنٹ کے وقت ان کی سابقہ عارضی سروس کو پنشن میں شمار نہیں کیا گیا جب کہ اعلیٰ عدالتوں نے واضح کیا ہے کہ مستقل ہونے کے بعد سابقہ سروس کو شامل کرنا لازمی قرار دیا گیا ہے۔
اتھارٹی کے وکیل نے دلائل دیتے ہوئے کہا کہ درخواست گزار ابتدائی طور پر تھرڈ پارٹی کنٹریکٹ ملازمین تھے اور انہوں نے مستقل ہونے کے وقت پچھلی سروس شامل نہ کرنے کی شرط قبول کی تھی اس لیے وہ پنشن کے حقدار نہیں ہیں۔ سندھ ہائی کورٹ نے سی اے اے کے دلائل مسترد کرتے ہوئے ریمارکس دیے کہ ریٹائرمنٹ کے بعد پنشن ملازمین کا حق ہے اور اس حق کو کسی انتظامی شرط سے ختم نہیں کیا جا سکتا۔
اگر عارضی سروس بغیر کسی وقفے کے مستقل ملازمت میں تبدیل ہو جاتی ہے، تو اس مدت کو پنشن کے لیے شمار کیا جائے گا۔ درخواست گزاروں کی سابقہ خدمات کو نظر انداز کرنا غیر قانونی ہے۔ عدالت نے حکم دیا کہ درخواست گزاروں کے پنشن کے واجبات کا ان کی پوری سروس (عارضی مدت سمیت) کی بنیاد پر دوبارہ گنتی کی جائے اور تمام بقایا جات 2 ماہ کے اندر ادا کیے جائیں۔
190ملین پاؤنڈ کیس، مرکزی اپیلیں باقاعدہ 7 مئی کو سماعت کیلئے مقررمزید پڑھیں:
