اسلام آباد: بلوچستان افسران خصوصی پیکج کے حوالے سے وفاقی حکومت نے اہم فیصلہ کرتے ہوئے بلوچستان میں خدمات انجام دینے والے پولیس گروپ آف پاکستان (پی ایس پی) اور پاکستان ایڈمنسٹریٹو سروس (پی اے ایس) کے افسران کیلئے خصوصی مراعاتی پیکج دینے کی تیاری مکمل کر لی ہے۔
ذرائع کے مطابق اس حوالے سے حتمی منظوری اقتصادی رابطہ کمیٹی (ای سی سی) کے اجلاس میں متوقع ہے۔ حکومت کا مؤقف ہے کہ بلوچستان اور گلگت بلتستان کو طویل عرصے سے “ہارڈ ایریاز” تصور کیا جاتا ہے، جہاں تعینات افسران کو مختلف انتظامی اور پیشہ ورانہ چیلنجز کا سامنا رہتا ہے۔
ماضی میں ہارڈ ایریاز میں تعیناتی کے لیے ایک خصوصی پالیسی مرتب کی گئی تھی، جس کے تحت گریڈ 20 تک کے افسران کی پوسٹنگ عمل میں لائی جاتی رہی۔ تاہم یہ پالیسی گزشتہ سال معطل کر دی گئی تھی، جس کے بعد ان علاقوں میں افسران کی تعیناتی اور مراعات سے متعلق مختلف مسائل سامنے آئے۔
ذرائع کا کہنا ہے کہ نئے مجوزہ پیکج کا مقصد بلوچستان اور گلگت بلتستان میں خدمات انجام دینے والے افسران کی حوصلہ افزائی کرنا اور انہیں بہتر سہولیات فراہم کرنا ہے تاکہ دور دراز اور حساس علاقوں میں انتظامی امور مزید مؤثر انداز میں چلائے جا سکیں۔
بلوچستان افسران خصوصی پیکج کے تحت مالی مراعات، سروس فوائد اور تعیناتی سے متعلق بعض سہولیات شامل کیے جانے کا امکان ہے، تاہم حتمی تفصیلات ای سی سی کی منظوری کے بعد سامنے آئیں گی۔
حکومتی حلقوں کے مطابق اس اقدام سے ان علاقوں میں تجربہ کار افسران کی دستیابی بہتر ہوگی اور عوامی خدمات کی فراہمی میں بھی بہتری آنے کی توقع ہے۔
