کراچی: پاکستان کا پہلا مقامی کریڈٹ کارڈ جلد متعارف کرایا جائے گا، جس کے بعد پاکستان ان چند ممالک میں شامل ہو جائے گا جہاں اپنی قومی ادائیگی اسکیم کے تحت کریڈٹ کارڈ کی سہولت دستیاب ہوگی۔ اس منصوبے کو ملک کے ڈیجیٹل مالیاتی نظام کے لیے ایک اہم سنگ میل قرار دیا جا رہا ہے۔
کراچی میں منعقدہ موبائل کامرس کانفرنس کے موقع پر ون لنک کے چیف ایگزیکٹو نجیب آگرہ والا نے بتایا کہ اسٹیٹ بینک آف پاکستان کے تعاون اور مختلف بینکوں کی شراکت سے “پے پاک” اسکیم کے تحت پاکستان کا پہلا مقامی کریڈٹ کارڈ جاری کیا جائے گا۔ ان کے مطابق اس اقدام سے نہ صرف ڈیجیٹل ادائیگیوں کو فروغ ملے گا بلکہ مالیاتی نظام میں زیادہ سے زیادہ افراد کی شمولیت بھی ممکن ہو سکے گی۔
انہوں نے کہا کہ نیا کریڈٹ کارڈ پورے پاکستان میں استعمال کیا جا سکے گا، جبکہ صارفین کو بیرونِ ملک ادائیگیوں کی سہولت بھی میسر ہوگی۔ اس منصوبے کی ایک اہم خصوصیت یہ ہے کہ اس کا مکمل انتظام ملک کے اندر ہی کیا جائے گا، جس سے اخراجات میں کمی اور نظام کی کارکردگی میں بہتری آئے گی۔
نجیب آگرہ والا کے مطابق ایسے بینک بھی اب کریڈٹ کارڈ جاری کر سکیں گے جو مہنگے انفراسٹرکچر کی وجہ سے پہلے یہ سہولت فراہم نہیں کر پاتے تھے۔ نئے نظام میں لچکدار ماڈل اختیار کیا گیا ہے، جس کے تحت بینک اپنی ضرورت کے مطابق مرحلہ وار سرمایہ کاری کر سکیں گے۔
انہوں نے یاد دلایا کہ ون لنک نے 2016 میں “پے پاک” ڈیبٹ کارڈ متعارف کرایا تھا، جس کے بعد پاکستان اپنی قومی ادائیگی اسکیم رکھنے والا دنیا کا 28واں ملک بن گیا تھا۔ آج ملک بھر میں پے پاک کے ایک کروڑ 61 لاکھ سے زائد کارڈ زیر استعمال ہیں اور یہ پاکستانی کارڈ مارکیٹ کا تقریباً 28 فیصد حصہ رکھتے ہیں۔
ماہرین کے مطابق مقامی کریڈٹ کارڈ کے اجرا سے ڈیجیٹل ادائیگیوں کا دائرہ وسیع ہوگا، بینکاری خدمات مزید آسان ہوں گی اور ملکی مالیاتی نظام بیرونی ادائیگی نیٹ ورکس پر انحصار کم کرنے کی سمت ایک اہم قدم اٹھائے گا۔
