اسلام آباد: پاکستان ایل این جی ٹینڈر کے اجرا کا فیصلہ آبنائے ہرمز میں حالیہ حملوں اور عالمی گیس سپلائی میں پیدا ہونے والی غیر یقینی صورتحال کے بعد کیا گیا ہے۔ حکومت نے ملک میں توانائی کی ضروریات پوری رکھنے کے لیے ہنگامی بنیادوں پر مائع قدرتی گیس (ایل این جی) کی خریداری کا عمل شروع کر دیا ہے۔
پاکستان ایل این جی لمیٹڈ (پی ایل ایل) کے مطابق عالمی سپلائرز سے فوری بنیادوں پر بولیاں طلب کر لی گئی ہیں۔ کمپنی کا کہنا ہے کہ بولیاں جمع کرانے کی آخری تاریخ کل مقرر کی گئی ہے، جبکہ موصول ہونے والی تمام بڈز اسی روز کھولی جائیں گی تاکہ خریداری کا عمل جلد مکمل کیا جا سکے۔
بین الاقوامی خبر رساں ادارے بلوم برگ کی رپورٹ کے مطابق پاکستان نے 15 اور 16 جولائی کو ایل این جی کارگو کی ترسیل کے لیے ایک ہنگامی ٹینڈر جاری کیا ہے۔ اس اقدام کا مقصد گیس کی فراہمی میں ممکنہ خلل سے نمٹنا اور ملکی توانائی نظام کو مستحکم رکھنا ہے۔
رپورٹ کے مطابق حکومت نے یہ فیصلہ اس وقت کیا جب قطر سے جولائی کے دوران آنے والی ایک ایل این جی کھیپ منسوخ ہو گئی، جس کے بعد اضافی گیس کی فوری ضرورت محسوس کی گئی۔ اسی تناظر میں پی ایل ایل کو ہنگامی خریداری کی منظوری دی گئی۔
توانائی کے ماہرین کا کہنا ہے کہ آبنائے ہرمز میں بڑھتی ہوئی کشیدگی نہ صرف عالمی تیل بلکہ گیس کی ترسیل پر بھی اثر انداز ہو سکتی ہے۔ اگر صورتحال مزید سنگین ہوتی ہے تو عالمی توانائی منڈی میں قیمتوں میں اضافہ اور سپلائی چین متاثر ہونے کا خدشہ موجود ہے۔
ماہرین کے مطابق پاکستان ایل این جی ٹینڈر سے قلیل مدت میں گیس کی دستیابی بہتر بنانے میں مدد مل سکتی ہے، تاہم عالمی حالات کے پیش نظر توانائی کی درآمدات پر مسلسل نظر رکھنا ضروری ہوگا۔
