کراچی: ایل این جی کارگو کی خریداری کے سلسلے میں پاکستان نے ایک اور اہم قدم اٹھاتے ہوئے سپاٹ مارکیٹ سے نئی کھیپ خریدنے کا فیصلہ کر لیا ہے۔ پاکستان پیٹرولیم لمیٹڈ (پی ایل ایل) نے اس حوالے سے کم ترین بولی منظور کر لی ہے۔
پی ایل ایل کے مطابق 15 اور 16 جولائی کو ایل این جی سپلائی کے لیے مجموعی طور پر تین بولیاں موصول ہوئیں، جن کا تکنیکی اور مالی جائزہ لینے کے بعد سب سے کم قیمت کی پیشکش کو قبول کر لیا گیا۔
پاکستان پیٹرولیم لمیٹڈ کے مطابق ایل این جی کارگو کے لیے سب سے کم بولی 18.23 ڈالر فی ایم ایم بی ٹی یو موصول ہوئی، جسے کامیاب قرار دیا گیا۔
کمپنی کے مطابق دیگر دو بولیاں بالترتیب 18.59 ڈالر اور 18.72 ڈالر فی ایم ایم بی ٹی یو تھیں، تاہم کم قیمت ہونے کے باعث پہلی بولی کو منظور کیا گیا۔
توانائی کے شعبے کے ماہرین کا کہنا ہے کہ سپاٹ مارکیٹ سے ایل این جی کی خریداری ملک میں گیس کی طلب پوری کرنے اور بجلی کی پیداوار کو برقرار رکھنے کے لیے اہم سمجھی جاتی ہے۔ ان کے مطابق عالمی توانائی مارکیٹ میں قیمتوں کے اتار چڑھاؤ کے باوجود مسابقتی بولیوں کے ذریعے کم قیمت پر کارگو حاصل کرنا مثبت پیش رفت ہے۔
حکام کے مطابق منظور شدہ کارگو مقررہ شیڈول کے تحت 15 سے 16 جولائی کے دوران پاکستان پہنچے گا، جس سے گیس کی فراہمی کو بہتر بنانے میں مدد ملے گی۔
