اسلام آباد: مٹی کے تیل کی قیمت میں بھی اضافہ کر دیا گیا ہے، جس کے بعد گھریلو اور تجارتی صارفین پر مزید مالی بوجھ پڑنے کا امکان ہے۔ حکومت نے پیٹرول اور ہائی اسپیڈ ڈیزل کی قیمتوں میں اضافے کے بعد مٹی کے تیل کے نئے نرخ بھی نافذ کر دیے ہیں۔
اوگرا کی جانب سے جاری نوٹیفکیشن کے مطابق مٹی کے تیل کی قیمت میں 11 روپے 19 پیسے فی لیٹر اضافہ کیا گیا ہے۔ اضافے کے بعد مٹی کے تیل کی نئی قیمت 242 روپے 33 پیسے فی لیٹر مقرر کر دی گئی ہے۔
یہ اضافہ ایسے وقت میں سامنے آیا ہے جب حکومت نے حال ہی میں پیٹرولیم مصنوعات کی قیمتوں پر نظرثانی کرتے ہوئے پیٹرول کی قیمت میں 13 روپے 18 پیسے فی لیٹر جبکہ ہائی اسپیڈ ڈیزل کی قیمت میں 13 روپے 80 پیسے فی لیٹر اضافہ کیا تھا۔
ماہرین کے مطابق مٹی کے تیل کی قیمت میں اضافے سے ان علاقوں کے صارفین زیادہ متاثر ہو سکتے ہیں جہاں اب بھی کھانا پکانے اور دیگر ضروریات کے لیے مٹی کا تیل استعمال کیا جاتا ہے۔ اس فیصلے کے باعث گھریلو اخراجات میں مزید اضافہ ہونے کا خدشہ بھی ظاہر کیا جا رہا ہے۔
توانائی کے شعبے کے تجزیہ کاروں کا کہنا ہے کہ عالمی منڈی میں خام تیل کی قیمتوں میں اتار چڑھاؤ کے باعث مقامی سطح پر بھی پیٹرولیم مصنوعات کی قیمتوں میں مسلسل رد و بدل دیکھنے میں آ رہا ہے۔
