پاکستان کو بڑا دھچکا، اہم کھلاڑی ویسٹ انڈیز اور انگلینڈ کیخلاف سیریز سے’’آؤٹ‘‘

لاہور: پاکستانی ٹیسٹ ٹیم کو بڑا دھچکا لگ گیا، کیونکہ نوجوان اوپننگ بلے باز عبداللہ فضل انجری کے باعث ویسٹ انڈیز اور انگلینڈ کے خلاف آئندہ ٹیسٹ سیریز سے باہر ہو گئے ہیں۔ پاکستان کرکٹ بورڈ (پی سی بی) نے ان کی انجری کی تصدیق کر دی ہے۔

پی سی بی کے مطابق 23 سالہ عبداللہ فضل کو ٹرینیڈاڈ میں واقع برائن لارا کرکٹ اکیڈمی میں ٹریننگ سیشن کے دوران کمر کے نچلے حصے میں تکلیف محسوس ہوئی۔ بعد ازاں ایم آر آئی اسکین اور طبی معائنے کے بعد ٹیم کے میڈیکل پینل نے انہیں مکمل بحالی کے لیے آرام اور ری ہیبلیٹیشن پروگرام اختیار کرنے کا مشورہ دیا۔

بورڈ کا کہنا ہے کہ عبداللہ فضل کی جگہ متبادل کھلاڑی کے انتخاب سے متعلق ابھی کوئی حتمی فیصلہ نہیں کیا گیا، تاہم جلد اس حوالے سے اعلان متوقع ہے۔

عبداللہ فضل نے رواں سال مئی میں بنگلہ دیش کے خلاف اپنے ٹیسٹ کیریئر کا آغاز کیا تھا، جہاں انہوں نے شاندار کارکردگی دکھاتے ہوئے ڈیبیو میچ کی دونوں اننگز میں نصف سنچریاں اسکور کی تھیں۔

اس کے علاوہ ویسٹ انڈیز سلیکٹ الیون کے خلاف وارم اپ میچ میں بھی وہ عمدہ فارم میں نظر آئے اور دونوں اننگز میں ناقابل شکست رہے۔ انہوں نے پہلی اننگز میں 50 جبکہ دوسری اننگز میں 48 رنز اسکور کیے تھے۔

عبداللہ فضل کی عدم موجودگی میں مڈل آرڈر بلے باز اویس ظفر کے ٹیسٹ ڈیبیو کے امکانات روشن ہو گئے ہیں، جبکہ تجربہ کار اوپنر امام الحق کے دوبارہ اوپننگ جوڑی کا حصہ بننے کی توقع ظاہر کی جا رہی ہے۔

کرکٹ شائقین کو امید ہے کہ نوجوان بلے باز جلد صحت یاب ہو کر دوبارہ قومی ٹیم کا حصہ بنیں گے۔