کراچی کا موسم آئندہ 24 گھنٹوں کے دوران گرم اور مرطوب رہنے کا امکان ظاہر کیا گیا ہے جبکہ شہر میں وقفے وقفے سے تیز ہوائیں بھی چل سکتی ہیں۔ محکمۂ موسمیات کے مطابق سمندری ہواؤں کے باوجود گرمی کی شدت برقرار رہنے کا امکان ہے جس کے باعث شہریوں کو احتیاط برتنے کی ہدایت کی گئی ہے۔
محکمۂ موسمیات کا کہنا ہے کہ کراچی میں زیادہ سے زیادہ درجۂ حرارت 35 سے 37 ڈگری سینٹی گریڈ تک جا سکتا ہے۔ دوسری جانب گزشتہ 24 گھنٹوں کے دوران شہر کا کم سے کم درجۂ حرارت 29.2 ڈگری سینٹی گریڈ ریکارڈ کیا گیا۔
موسمیاتی ماہرین کے مطابق شہر میں جنوب مغرب کی سمت سے 18 کلو میٹر فی گھنٹہ کی رفتار سے ہوائیں چل رہی ہیں جبکہ ہوا میں نمی کا تناسب 75 فیصد ریکارڈ کیا گیا ہے، جس کی وجہ سے حبس کی کیفیت زیادہ محسوس کی جا رہی ہے۔
کراچی کا موسم حالیہ دنوں میں مسلسل گرم رہنے کے باعث شہریوں کو شدید مشکلات کا سامنا ہے۔ ماہرین صحت نے شہریوں کو ہدایت کی ہے کہ غیر ضروری طور پر دھوپ میں نکلنے سے گریز کریں، زیادہ پانی استعمال کریں اور بچوں و بزرگوں کا خصوصی خیال رکھیں۔
ادھر محکمۂ موسمیات نے امکان ظاہر کیا ہے کہ آئندہ چند روز کے دوران بھی شہر میں موسم گرم اور مرطوب رہ سکتا ہے جبکہ سمندری ہواؤں کی رفتار میں اتار چڑھاؤ متوقع ہے۔
