کراچی: سندھ میں بارش کی پیشگوئی کے بعد مختلف اضلاع میں موسم کی صورتحال پر شہریوں کی نظریں جمی ہوئی ہیں۔ محکمہ موسمیات کے مطابق بالائی علاقوں میں مغربی ہواؤں کے اثرات اور شدید گرمی کے باعث سندھ کے بعض علاقوں میں آندھی اور گرج چمک کے ساتھ بارش متوقع ہے۔
ارلی وارننگ سینٹر کی تازہ رپورٹ کے مطابق آج کشمور، گھوٹکی، قمبر شہدادکوٹ، لاڑکانہ اور دادو کے چند مقامات پر ہلکی بارش اور تیز ہواؤں کا امکان موجود ہے۔ ماہرین موسمیات کا کہنا ہے کہ ان علاقوں میں گرج چمک کے ساتھ مختصر دورانیے کی بارش بھی ہو سکتی ہے جس سے گرمی کی شدت میں وقتی کمی آنے کا امکان ہے۔
دوسری جانب صوبے کے بیشتر اضلاع میں موسم گرم، شدید گرم اور خشک رہنے کی پیشگوئی کی گئی ہے۔ دن کے اوقات میں درجہ حرارت معمول سے زیادہ رہنے کا امکان ہے جبکہ شہریوں کو احتیاطی تدابیر اختیار کرنے کی ہدایت کی گئی ہے۔
سندھ میں بارش کی پیشگوئی کے باوجود کراچی میں آئندہ تین روز تک بارش کا کوئی امکان ظاہر نہیں کیا گیا۔ محکمہ موسمیات کے مطابق شہر قائد میں موسم ابر آلود، گرم اور مرطوب رہ سکتا ہے جبکہ زیادہ سے زیادہ درجہ حرارت 35 سے 37 ڈگری سینٹی گریڈ کے درمیان رہنے کی توقع ہے۔
کراچی میں صبح کے وقت ہوا میں نمی کا تناسب 70 فیصد جبکہ شام کے اوقات میں 75 فیصد تک پہنچ سکتا ہے۔ ماہرین کے مطابق سمندری ہوائیں معمول کے مطابق چلتی رہیں گی جس سے موسم میں کچھ حد تک بہتری محسوس کی جا سکتی ہے، تاہم حبس برقرار رہنے کا امکان موجود ہے۔
