اسلام آباد: گلگت بلتستان انتخابات فارم 45 کے معاملے پر پاکستان پیپلز پارٹی نے شدید تحفظات کا اظہار کرتے ہوئے دعویٰ کیا ہے کہ متعدد حلقوں میں ان کے امیدواروں اور پولنگ ایجنٹس کو فارم 45 فراہم نہیں کیا جا رہا۔
پیپلز پارٹی کے سیکرٹری جنرل نیئر حسین بخاری نے ایک بیان میں کہا کہ گلگت بلتستان انتخابات فارم 45 کی فراہمی میں رکاوٹیں پیدا کی جا رہی ہیں اور بعض مقامات پر پارٹی نمائندوں کو نتائج کے حصول کے بجائے واپس جانے کا کہا جا رہا ہے۔
انہوں نے کہا کہ اس صورتحال سے متعلق چیف الیکشن کمشنر کو آگاہ کر دیا گیا ہے اور الیکشن کمیشن کو فوری طور پر اپنا کردار ادا کرنا چاہیے تاکہ انتخابی عمل کی شفافیت پر کوئی سوال نہ اٹھے۔
نیئر حسین بخاری کے مطابق فارم 45 انتخابی نتائج کی شفافیت کے لیے بنیادی دستاویز ہے اور اس کی عدم فراہمی سیاسی جماعتوں کے خدشات میں اضافہ کر سکتی ہے۔
دوسری جانب چیف الیکشن کمشنر گلگت بلتستان راجہ شہباز خان نے میڈیا سے گفتگو کرتے ہوئے کہا کہ پورے خطے میں پولنگ کا عمل پرامن ماحول میں مکمل ہوا اور اب تک کسی قسم کی باضابطہ شکایت موصول نہیں ہوئی۔
انہوں نے مختلف پولنگ اسٹیشنز کا دورہ بھی کیا اور انتخابی انتظامات کا جائزہ لیا۔ ان کا کہنا تھا کہ ووٹرز نے بھرپور جوش و خروش کے ساتھ انتخابی عمل میں حصہ لیا اور مجموعی طور پر انتخابات خوش اسلوبی سے منعقد ہوئے۔
تاہم پیپلز پارٹی کی جانب سے فارم 45 کے حوالے سے سامنے آنے والے اعتراضات کے بعد انتخابی نتائج اور انتخابی عمل کی شفافیت پر سیاسی بحث شروع ہو گئی ہے، جبکہ الیکشن کمیشن کے آئندہ اقدامات پر بھی نظریں مرکوز ہیں۔
