کلائمیٹ لیڈر شپ ڈویلپمنٹ انٹرن شپ پروگرام میں درخواست کیسے دیں

کلائمیٹ لیڈر شپ ڈویلپمنٹ انٹرن شپ پروگرام میں درخواست کیسے دیں یہ سوال نوجوانوں میں اس وقت نمایاں ہو گیا ہے جب حکومت پنجاب نے ایک نیا پروگرام شروع کیا ہے۔

وزیراعلیٰ پنجاب مریم نواز نے اس پروگرام کا آغاز کیا۔ اس منصوبے کا مقصد نوجوانوں کو ماحولیاتی بہتری اور موسمیاتی آگاہی کے عمل میں شامل کرنا ہے۔

اس پروگرام کے تحت منتخب انٹرنز کو ماہانہ ساٹھ ہزار روپے وظیفہ دیا جائے گا۔ انٹرن شپ کی مدت تین ماہ ہوگی اور مکمل کرنے پر سرکاری سرٹیفکیٹ بھی دیا جائے گا۔

حکومت پنجاب نے اس پروگرام میں طالبات کے لیے پچاس فیصد نشستیں مختص کی ہیں۔ انتخاب میرٹ کی بنیاد پر ہوگا اور ہر ضلع کے نوجوانوں کو نمائندگی کا موقع دیا جائے گا۔

انٹرنز کو ماحولیاتی تحفظ کے شعبے میں عملی تجربہ حاصل ہوگا۔ انہیں ماحولیاتی تحفظ کے ادارے اور ماحولیاتی پالیسی یونٹ کے ساتھ کام کرنے کا موقع بھی ملے گا۔

اس کے علاوہ جدید تعلیمی نظام کے ذریعے تربیت دی جائے گی اور ممکنہ طور پر عالمی سطح کے ادارے کی تصدیق بھی حاصل ہوسکے گی۔

درخواست دینے کا طریقہ

نوجوان اس پروگرام کے لیے آن لائن درخواست دے سکتے ہیں۔

درخواست دینے کے لیے سرکاری ویب سائٹ پر جائیں:
epd.punjab.gov.pk/climateinternship

درخواست جمع کروانے کی آخری تاریخ انتیس مارچ مقرر کی گئی ہے۔

وزیراعلیٰ پنجاب مریم نواز نے کہا ہے کہ ماحولیاتی بہتری کے مشن میں نوجوانوں کی شمولیت خوش آئند ہے اور ہر نوجوان اس پروگرام کے ذریعے مثبت کردار ادا کرسکتا ہے۔

انہوں نے مزید کہا کہ مسلسل کوششوں کے باعث پنجاب خصوصاً لاہور میں ماحولیاتی آلودگی میں کمی آ رہی ہے۔