بالی ووڈ سپر اسٹار Salman Khan نے حالیہ انٹرویو میں اپنی زندگی کے اہم لمحات، خطرناک اسٹنٹس، والد کے مشوروں اور کامیابی کے راز سے متعلق کھل کر گفتگو کی۔ سلمان خان کا کہنا ہے کہ فلمی دنیا میں کامیابی کا کوئی طے شدہ فارمولا موجود نہیں اور ہر فنکار کو اپنے دل کی آواز سن کر فیصلے کرنے چاہئیں۔
بھارتی میڈیا کو دیے گئے انٹرویو میں سلمان خان نے بتایا کہ ان کے کیریئر کا سب سے خطرناک اسٹنٹ فلم “جاگرتی” کے دوران تھا، جہاں انہیں تقریباً 80 فٹ اونچی چھلانگ لگانی پڑی۔ اداکار نے کہا کہ پہاڑ کی ساخت ایسی تھی کہ نیچے رکھے گئے حفاظتی گدے بھی نظر نہیں آ رہے تھے اور انہیں مکمل اندازے پر چھلانگ لگانا پڑی۔
سلمان خان کے مطابق چھلانگ کے دوران ان کا پاؤں پھسل گیا اور وہ ایک چٹان سے بالکل قریب جا گرے، تاہم خوش قسمتی سے بڑی حادثے سے بچ گئے۔ اداکار نے کہا کہ اس وقت وہ پیچھے نہیں ہٹ سکتے تھے کیونکہ وہاں موجود لوگوں کے سامنے یہ ان کی انا کا مسئلہ بن چکا تھا۔
اداکار نے اپنے والد Salim Khan کے ساتھ تعلق پر بھی گفتگو کرتے ہوئے بتایا کہ جب بھی کسی فلم کی اسکرپٹ کے حوالے سے الجھن ہوتی ہے تو وہ سب سے پہلے اپنے والد سے مشورہ کرتے ہیں۔ سلمان کے مطابق وہ آج بھی والد کی رائے کو سب سے زیادہ اہمیت دیتے ہیں۔
انہوں نے یہ بھی انکشاف کیا کہ اپنی پہلی بڑی کمائی سے انہوں نے والد کیلئے ایک مہنگی رولیکس گھڑی خریدی تھی، حالانکہ اس وقت ان کے پاس زیادہ پیسے نہیں تھے۔ بعد میں ان کے والد نے وہ گھڑی دوبارہ سلمان خان کو تحفے میں دے دی، جو آج بھی ان کیلئے خاص اہمیت رکھتی ہے۔
فلموں کے انتخاب کے بارے میں سلمان خان نے کہا کہ وہ خود اسکرپٹ پڑھنے کے بجائے ہدایتکار یا رائٹر سے کہانی سننا پسند کرتے ہیں کیونکہ اس طرح وہ فلم کے اصل وژن کو بہتر انداز میں سمجھ پاتے ہیں۔
کامیابی کے راز پر بات کرتے ہوئے سلمان خان نے کہا کہ کوئی بھی شخص یہ نہیں جانتا کہ سپر اسٹار بننے کا اصل فارمولا کیا ہے۔ ان کے مطابق لوگ محنت، نظم و ضبط اور اچھی اسکرپٹس کو کامیابی کی وجہ قرار دیتے ہیں، لیکن حقیقت میں شائقین کی پسند کا اندازہ لگانا آسان نہیں ہوتا۔
