کراچی: سحر ہاشمی عمران ہاشمی سے موازنہ کیے جانے پر پہلی بار کھل کر سامنے آ گئیں۔ پاکستانی اداکارہ نے ڈراموں میں گلے ملنے والے مناظر پر ہونے والی تنقید کا جواب دیتے ہوئے کہا ہے کہ انہوں نے ہمیشہ اسکرپٹ اور ہدایت کار کی ہدایات کے مطابق کام کیا۔
سحر ہاشمی نے ایک حالیہ انٹرویو میں کہا کہ انہیں ڈراموں میں بعض مناظر کی وجہ سے سوشل میڈیا پر “پاکستانی عمران ہاشمی” کہا جانے لگا، تاہم ان کا مؤقف ہے کہ ہر اداکار اپنے کردار اور کہانی کی ضرورت کے مطابق اداکاری کرتا ہے۔
اداکارہ کے مطابق انہوں نے صرف وہی مناظر فلمائے جو ڈرامے کے اسکرپٹ کا حصہ تھے اور جنہیں ہدایت کار کے وژن کے مطابق شوٹ کیا گیا۔ ان کا کہنا تھا کہ کسی ایک اداکار کو الگ سے تنقید کا نشانہ بنانا مناسب نہیں، کیونکہ تمام فنکار اپنے کردار کے تقاضوں کے مطابق کام کرتے ہیں۔
سحر ہاشمی نے اعتراف کیا کہ اگر ناظرین ایسے مناظر پسند نہیں کرتے تو وہ آئندہ اپنے کرداروں کے انتخاب اور ایسے سینز کے حوالے سے مزید احتیاط برتیں گی۔
انہوں نے کہا کہ بطور اداکار وہ ہمیشہ اپنے مداحوں کی رائے کا احترام کرتی ہیں اور کوشش کریں گی کہ مستقبل میں ایسے کردار ادا کریں جو ناظرین کی توقعات پر بھی پورا اتریں۔
واضح رہے کہ سحر ہاشمی نے اپنے کیریئر کا آغاز ڈرامہ “ظلم” سے کیا تھا۔ بعد ازاں وہ “من مست ملنگ”، “زنجیریں” اور “شیدائی” جیسے ڈراموں میں اپنی اداکاری کے باعث شہرت حاصل کر چکی ہیں۔
