ممبئی: بالی ووڈ اداکارہ ایشا دیول نے طلاق کے بعد خود کو “سنگل مدر” کہے جانے پر ردعمل دیتے ہوئے واضح کیا ہے کہ وہ اس اصطلاح سے اتفاق نہیں کرتیں اور اپنی زندگی کو اس زاویے سے نہیں دیکھتیں۔
ایشا دیول سنگل مدر کے حوالے سے جاری بحث پر گفتگو کرتے ہوئے اداکارہ نے کہا کہ اگرچہ وہ اور ان کے سابق شوہر بھرت تختانی الگ ہو چکے ہیں، تاہم دونوں آج بھی اپنی بیٹیوں کی پرورش کے لیے مل کر ذمہ داریاں نبھا رہے ہیں۔
ایک حالیہ انٹرویو میں ایشا دیول نے کہا کہ طلاق کے بعد والدین کی ذمہ داریاں ختم نہیں ہوتیں بلکہ ان کی نوعیت تبدیل ہو جاتی ہے۔ ان کے مطابق وہ اور بھرت تختانی اپنی دونوں بیٹیوں، رادھیا اور میرایا، کی تعلیم، تربیت اور خوشی کو اولین ترجیح دیتے ہیں۔
اداکارہ نے کہا کہ وہ خود کو سنگل مدر اس لیے نہیں سمجھتیں کیونکہ بچوں کی زندگی میں والد اب بھی بھرپور کردار ادا کر رہے ہیں۔ ان کا کہنا تھا کہ دو بالغ اور سمجھدار افراد علیحدگی کے باوجود اپنے بچوں کے بہتر مستقبل کے لیے ایک ٹیم کی طرح کام کر سکتے ہیں۔
ایشا دیول نے مزید کہا کہ والدین کے درمیان باہمی احترام اور تعاون بچوں کی ذہنی اور جذباتی نشوونما کے لیے بے حد ضروری ہے۔ اسی وجہ سے وہ اور ان کے سابق شوہر مشترکہ والدین کے اصول پر عمل پیرا ہیں۔
واضح رہے کہ ایشا دیول، بھارتی فلم انڈسٹری کے معروف اداکار دھرمیندر اور اداکارہ ہیما مالنی کی صاحبزادی ہیں۔ انہوں نے 2012 میں بھرت تختانی سے شادی کی تھی، جبکہ 2024 میں دونوں نے باہمی رضامندی سے علیحدگی اختیار کر لی تھی۔
طلاق کے باوجود دونوں کے خوشگوار تعلقات اور بچوں کی مشترکہ پرورش کے فیصلے کو مداحوں کی جانب سے سراہا جا رہا ہے۔
