اوراسلامی انقلاب کی پیش قدمی رک گئی۔فرانس کی سرزمین پر10اکتوبر732 میں ’’بلاط الشہدا‘‘کہلانے والی تاریخ سازجنگ لڑی گئی۔طورس اورپواشیرزکے درمیان واقع رومی شاہراہ پرمقابل فوجوں کے درمیان رن پڑا۔یہ جگہ جبلِ طارق سے جہاں طارق بن زیاد30 اپریل711 کو اترا تھا، ایک ہزارمیل شمال میں تھی۔ممتازمؤرخین گبن اور لینن پول کاکہناہے کہ اگرمسلمان یہ جنگ جیت جاتے توپیرس اورلندن میں گرجا گھروں کی جگہ مسجدیں نظرآتیں اوروہاں کی عظیم دانش گاہوں میں بائبل کی جگہ قرانِ کریم کی تفسیر پڑھائی جاتی۔سیدامیرلکھتے ہیں،،طورس کے میدانوں پرعربوں نے اس وقت عالمی سلطنت گنوادی جبکہ یہ ان کی مٹھی میں تھی۔حکم عدولی اورباہمی خلفشارجومسلم معاشرہ کاابدی ناسور اورلعنت رہے ہیں،اس تباہی کاباعث بنے۔
دولت کی ہوس اورباہمی انتشارنے کام دکھایا۔ ان کوتاہیوں نے کہاں کہاں ملتِ اسلامیہ کا راستہ نہیں روکا،کیاکیازخم نہیں کھائے ،ہم نے جہاں بھی شکست کھائی مڑکردیکھاتوکمیں گاہ میں کچھ اپنے نظرآئے۔ حرص وہ بلاہے جوانہیں سوچنے کی مہلت تک نہیں دیتی کہ بے حدوحساب دولت کس کام آئے گی،خاص طورپروہ جس کے انبارغیرملکی بینکوں میں لگائے گئے،چوری چھپے کے کھاتوں میں دھرے ہیں۔باہم خلفشاربھی کہاں کم ہوا،کس نے کس کی پیٹھ میں چھرانہیں گھونپا،اپنے پرائے جس کا دالگاوہی موقع پاتے ہی اپنے کرم فرماؤں پر چڑھ دوڑا،اقتدارتودولت سے بھی بری بلاہے۔
جوں جوں طاقت خواہ وہ خلافت کی شکل میں تھی یابادشاہوں کے روپ میں براجمان تھی،کمزور پڑنے لگی،ناچاقی اورانتشار نے سراٹھایا،ہرطرف یورش بپاہونے لگیں،چھوٹے چھوٹے راجواڑے وجودمیں آتے گئے،وسائل بکھرتے گئے اورمرکزی حکومت کادائرہ اختیارسکڑتاگیا۔آخری عباسی خلیفہ المستعصم ہوں یا آخری مغل بادشاہ بہادرشاہ ظفر،دونوں ہواکاجھونکاآتے ہی تنکوں کی طرح اڑگئے۔ایک بے بسی کے عالم میں تاتاریوں کے گھوڑوں کے سموں تلے رونداگیا، دوسرا پابجولاں وطن سے سینکڑوں میل دوررنگون میں حوالہ زنداں ہوا۔بہادرشاہ ظفرشاعرتھا،شکست اورمحرومی کا اظہار کرگیا،اسے دفن کیلئے،،کوئے یار،،میں دوگززمین نہ ملنے کانوحہ کہنے کی مہلت تومل گئی۔خلیفہ المستعصم توبے چارگی میں بھی دوقدم آگے نکلا۔کہتے ہیں کہ اپنے مصاحبوں کے ہمراہ جب وہ اپنے آپ کوتاتاریوں کے حوالے کرچکاتواسے ہلاکوخان کے حضورپیش کیا گیا۔ ہلاکونے سونے کی کچھ ڈلیاں اس کی طرف بڑھاتے ہوئے کہا،،اسے کھاؤ،،مجبورقیدی نے پریشان ہوتے ہوئے عرض کیا’’سوناکھایا نہیں جاتا‘‘جواب ملاتو ’’پھر ڈھیروں جمع کیوں کررکھاتھا،اگرہمیں بھجوادیا ہوتا توآج عیش وآرام سے جی رہے ہوتے،ایسانہیں کرناتھاتو اپنے دفاع کے لئے خرچ کیاہوتا‘‘۔
مال ودولت کی ہوس نے کیاکیاگل نہیں کھلائے،حرص کی نہ کوئی سیماہے نہ حد،یہ وہ شعلہ ہے جو لپکتاہی جاتاہے۔انسان مجموعہ اضدادہے۔مرغوب چیزوں پرفریفتہ ہونا جہاں ایک فطری امرہے وہیں جودوسخاکا بیج بھی اس کے من کوقدرت کی طرف سے عطاہواہے۔کون کس ڈگرپرچلے،فیصلہ اس کے اپنے ہاتھوں میں ہے۔ارشادربانی ہے: لوگوں کومرغوب چیزوں کی محبت نے فریفتہ کیاہواہے جیسے عورتیں اوربیٹے اورسونے اورچاندی کے جمع کیے ہوئے خزانے اورنشان کیے ہوئے گھوڑے اورمویشی اورکھیتی یہ دنیاکی زندگی کا فائدہ ہے اوراللہ ہی کے پاس اچھاٹھکانہ ہے۔(آل عمران۔14)اصل دولت تواللہ کی رضااور ’’رضوان‘‘ ہے،جس خوش نصیب کویہ خزانہ مل گیااس کے دونوں جہان سنورگئے،جو اس سے محروم رہا،وہ بازی ہار گیا۔ پردہ اٹھنے کی دیرہے جب اسی سونے چاندی سے جس کے انبارلگاتے نہیں تھکتے،ان کی پیشانیاں داغی جائیں گی،پھریادآئے گاکہ اسے اللہ کی راہ میں خرچ کردیناہی بہترتھا۔ہوسکتاہے کوئی ہلاکوخان اسی دارِفانی میں اس’’سونے کوتناول فرمانے‘‘کی فرمائش کرے۔
چھوٹے اوربڑے انسان میں غالباًفرق ہی اتناہے کہ چھوٹاآدمی’’حب الشہوات‘‘میں گرفتارہے اوربڑاانسان کسی اعلیٰ مقاصدکے حصول میں کوشاں۔ پہلاجاہ ومال پرجان ودل سے فداہے،دنیابھرکی دولت سمیٹناچاہتاہے،بڑے سے بڑے عہدے تک پہنچناچاہتا ہے،پہنچ پائے تواس کے چھن جانے کے خیال سے ہی ہلکان رہتاہے۔وہ اسے دوام دینا چاہتا ہے،اس کے لئے سب کچھ روارکھتا ہے۔قانون، اخلاق، مذہب، انسانیت جوبھی راہ میں حائل ہو،اسے کچل دیاجائے، ہرحربہ روارکھاجائے تاکہ اس کااقتدارطول پکڑتا جائے اور مال واسباب میں اضافہ ہوتارہے۔ بدقسمتی سے دورِحاضرمیں اقتداراوردولت لازم وملزوم ٹھہرے ہیں۔
اہل سیاست میں اکثراسے ناقابلِ تردید حقیقت سمجھ بیٹھے ہیں کہ قارون کاخزانہ پاس نہ ہوتو اقتدارتک رسائی ناممکن ہے۔یہ مفروضہ نہائت خطرناک کھیل کوجنم دیتاہے۔ایک نہ ختم ہونے والی بے رحم دوڑشروع ہوجاتی ہے جس میں حصولِ مقصد کے لئے سب کچھ روارکھاجاتاہے۔بدعنوانی، رشوت، چور بازار ی، راہزنی اوراس قبیل کی ساری بلائیں سیلاب کی صورت امڈآتی ہیں۔ملک کیامعاشرہ بھی غیرمستحکم ہوجاتاہے۔ اضطراب کے عالم میں لوگ ادھرادھربھاگنے لگتے ہیں۔ ناجائزکمائی کوچھپانے کے لئے کونے کھدرے تلاش کرناپڑتے ہیں۔
مالِ حرام جہاں سے کمایا،وہاں وہ خودکومحفوظ محسوس نہیں کرتا۔اس کی اڑان لازم ہے،موسمی پرندوں کی طرح یہ خوشگوار ماحول کی تلاش میں محفوظ مقامات پر چلاجاتاہے۔اس کے ’’مالکوں‘‘ پرچھائیاں پڑنے لگیں تووہ بھی بدیش سدھارجاتے ہیں۔وطن ِ عزیز غریب سے غریب ترہوتاجاتاہے، ایک طرح لٹیروں کادیس بن جاتاہے جن میں کئی ایک شب بھر میں ارب پتی بنناچاہتے ہیں ،جس کابھی بس چلے وہ اندھیرے اجالے میں چوکتانہیں۔اقتدارمیں آنے والوں میں سے کچھ توایسے ہوتے ہیں جواس کارِخیر میں ایک دوسرے کو مات دینے کی فکرمیں ہوتے ہیں۔نجی محفلوں میں کھلے بندوں تذکرہ ہوتاہے کہ فلاں بازی لے گیااورفلاں پیچھے رہ گیا۔وزارتوں اورقلمدانوں کی قیمت لگتی ہے،نیاز مندو ں کودودھ دینے والی گائیں عطاہوتی ہیں اوروہ جنہیں ’’شاہ جہانِ وقت‘‘کوشیشے میں اتارنے کافن نہیں آتا،وہ عنائتِ خسروانہ سے محروم رہتے ہیں۔حالات کی مجبوری کے پیشِ نظراگرانہیں کچھ دینابھی پڑے توکوئی بے فیض ساعہدہ جس کے ہونے اورنہ ہونے سے کوئی چنداں فرق نہیں پڑتا،ان کامقدربنتاہے۔
سیاست ایک بہتادریاہے جس کاپانی کبھی اتناشفاف تھا کہ کناروں پرکھڑے اشجارجھک جھک کرا س میں اپناعکس دیکھتے تھے۔صاف ستھرے،وضعدار لوگ جنہیں اپنی عزت کا پاس تھا،ملک وقوم کی خدمت کے لئے اس میدان میں اترتے تھے۔شرافت، متانت،عوام کی خیرخواہی اورکارِثواب کی تمناان کے لئے زادِراہ ہوتے تھے۔اپنی جیب سے خرچ کرتے تھے ۔دولت مندنہ ہوں تو دل کے غنی ہوتے تھے۔ان کی غیرت گوراہ نہیں کرتی تھی کہ خدمتِ خلق کے عوض کوئی معاوضہ یامالی فائدہ حاصل کریں۔ بڑے غیوراورپاک طینت لوگ تھے ۔ اللہ رحمت کرے ان عظیم ہستیوں پرجوآزادی کی نعمت سے قوم کوہمکنارکرگئے۔حرص و ہوس کی زنجیریں اگروہ نہ توڑچکے ہوتے تومنزل تک پہنچنے سے بہت پہلے بک گئے ہوتے۔ خریداروں کی نہ آج کمی ہے نہ اس وقت تھی،مال بکاہوتوگاہک بہت،ڈرانے والے اس دورمیں بھی بہت تھے۔امریکی سلطنت توابھی زچگی کے عالم میں ہے پھربھی ایک دنیاڈری سہمی سجدے میں پڑی ہے۔قائداعظم اوران کے ساتھیوں کوتوبرطانوی سامراج کاسامناتھاجس کی سلطنت میں واقعی کبھی سورج غروب نہیں ہوتا تھا۔وہ لاکھ مہذب حکمران سہی مگر قیدخانے ان کے بھی تھے۔آزادی کے متوالے سیاستدانوں سے حاکم لوگ پیارومحبت کی پینگیں نہیں بڑھاتے تھے۔پاکستان کامطالبہ کرنے والے توبہتوں کے پہلو میں کانٹے کی طرح چبھتے تھے۔اگرہمارے محسن ڈر گئے ہوتے یاخدانخواستہ بک گئے ہوتے توپاکستان نہ بن پاتا۔ پاک سرزمین کی حفاظت وہی جذبہ مانگتی ہے۔یہ دھرتی شاداورآباد اسی صورت میں رہ سکتی ہے جب ہر سطح پراس کی قیاد ت حرص و ہوااورخوف کی زنجیریں یوں توڑدے کہ ان کے ٹوٹنے کی چھنک دنیاکے کونے کونے میں سنائی دے۔اللہ کرے ہم ایسا کر پائیں!
ِسن لیں کہ میرارب کس طرح رہنمائی فرمارہاہے:
مسلمانو !اللہ تمہیں حکم دیتا ہے کہ امانتیں اہلِ امانت کے سپرد کرو، اور جب لوگوں کے درمیان فیصلہ کرو تو عدل کے ساتھ کرو، اللہ تم کو نہایت عمدہ نصیحت کرتا ہے اور یقینا اللہ سب کچھ سنتا اور دیکھتا ہے۔(النساء:58)
اور یہ دنیا کی زندگی کچھ نہیں ہے مگر ایک کھیل اور دل کا بہلاوا۔ اصل زندگی کا گھر تو دارِ آخرت ہے، کاش یہ لوگ جانتے ۔(العنکبوت:64)
رہے نام میرے رب کاجودلوں کے حال جانتاہے!
