سنہری مچھلی گاڑی چلاتی ہے اور اس انوکھے تجربے نے سب کو حیران کر دیا۔ نیدرلینڈز میں ایک انجینئر نے اپنی پالتو مچھلی کے لیے خاص گاڑی تیار کی۔
اس تجربے میں مچھلی نے ایک منٹ کے اندر چالیس فٹ سے زیادہ فاصلہ طے کیا اور نیا عالمی ریکارڈ قائم کیا۔
انجینئر تھامس ڈی وولف نے اپنی پالتو سنہری مچھلی بلب کے لیے یہ منفرد گاڑی بنائی۔ گاڑی چار پہیوں پر مشتمل ہے اور اس کے اوپر پانی کا ایک ٹینک نصب کیا گیا ہے۔
یہ ٹینک دراصل ڈرائیور کی نشست کا کام کرتا ہے جہاں مچھلی تیرتی رہتی ہے۔ گاڑی کے اندر لگے حساس آلات مچھلی کی حرکت کو محسوس کرتے ہیں۔
جب مچھلی کسی سمت میں حرکت کرتی ہے تو یہ آلات اشارہ بھیجتے ہیں اور گاڑی اسی سمت میں چلنے لگتی ہے۔
ریکارڈ کے مطابق مچھلی نے ایک منٹ میں چالیس فٹ اور تین اعشاریہ چھیالیس انچ کا فاصلہ طے کیا۔
یہ منفرد کارنامہ عالمی ریکارڈز میں شامل کر لیا گیا جس کے بعد یہ تجربہ دنیا بھر میں توجہ کا مرکز بن گیا۔
انجینئر تھامس کا کہنا ہے کہ مچھلی کی ڈرائیونگ عملی طور پر استعمال کے لیے نہیں ہے۔ تاہم اس ٹیکنالوجی سے مستقبل میں معذور افراد کے لیے نئی سہولتیں پیدا ہو سکتی ہیں۔
انہوں نے خوشی کا اظہار کرتے ہوئے مذاق میں کہا کہ اب انہیں سمجھ نہیں آ رہا کہ وہ مچھلی کو کیسے بتائیں کہ اس نے عالمی ریکارڈ بنا لیا ہے۔
