اسلام آباد (اوصاف نیوز) سپین کی معروف یونیورسٹی Universidad Pontificia Comillas نے سال 2026 کے لیے پاکستانی امیدواروں سمیت بین الاقوامی طلباء کے لیے مکمل طور پر فنڈڈ پی ایچ ڈی سکالرشپ کا اعلان کیا ہے۔
یونیورسٹی کے مطابق، یہ وظائف ان طلباء کے لیے مختص ہیں جو عالمی سطح پر معاشیات، اختراعات اور پائیداری جیسے تحقیقی شعبوں میں اپنا کیریئر بنانا چاہتے ہیں۔ پروگرام کے تحت منتخب امیدواروں کو 23,463 یورو کا سالانہ وظیفہ، 90 فیصد ٹیوشن فیس کی چھوٹ، ہیلتھ انشورنس، ریسرچ ورک اسپیس، لیپ ٹاپ اور بین الاقوامی سفری الاؤنس فراہم کیا جائے گا۔ اسکالرشپ چار سال کی مدت کے لیے ہوگی جس کی کارکردگی کی بنیاد پر ہر سال تجدید کی جاسکتی ہے۔
یونیورسٹی انتظامیہ کے مطابق یہ اسکالرشپ ڈیجیٹل اکانومی، سرکلر اکانومی اینڈ انرجی، بینکنگ ریگولیشن، ہیومن اینیمل ریلیشنز اور سوشل چینج میں دستیاب ہے۔ درخواست دہندگان کے پاس بیچلر یا ماسٹر ڈگری (کم از کم 300 ECTS کریڈٹ کے ساتھ) اور انگریزی میں C1 لیول کا سرٹیفکیٹ پیش کرنا ضروری ہے۔
ہسپانوی زبان کی مہارتیں لازمی نہیں ہیں لیکن انہیں اضافی ترجیح دی جائے گی۔ اس کے علاوہ، امیدواروں کو ایک جامع تحقیقی تجویز، دو ریفری خطوط اور تعلیمی سرٹیفکیٹ جمع کروانا ہوں گے۔ ترجمان کے مطابق یہ یونیورسٹی میڈرڈ کے قلب میں واقع ہے اور یہ تحقیق، اختراعات اور بین الاقوامی تعاون کے امتزاج کے لیے مشہور ہے۔ اسکالرشپ کے تحت منتخب طالب علم کو تحقیقی منصوبوں میں شامل کیا جائے گا جن کے نتائج عالمی اہمیت کے حامل ہوں گے۔
دلچسپی رکھنے والے امیدوار یونیورسٹی کے آفیشل پورٹل کے ذریعے آن لائن درخواست جمع کر سکتے ہیں۔ انتظامیہ نے کہا کہ درخواستوں کا رولنگ کی بنیاد پر جائزہ لیا جائے گا، اس لیے دلچسپی رکھنے والے امیدوار جلد از جلد درخواست دیں۔ درخواست دینے کے لیے، ویب سائٹ https://www.comillas.edu/ پر اس لنک پر کلک کریں۔
مزید پڑھیں:گاڑیوں کے اخراج کی مفت جانچ ختم، اب گاڑیوں کے مالکان کو فیس ادا کرنا ہوگی
