کوئٹہ (نیوز ڈیسک) ضلع پشین کے علاقے یارو میں مسلح افراد نے ایک گھر پر وحشیانہ حملہ کیا اور رشتے کے تنازع پر اندھا دھند فائرنگ کردی جس کے نتیجے میں خاتون سمیت 3 افراد جاں بحق جب کہ گھر کی ایک خاتون شدید زخمی ہوگئی۔
تفصیلات کے مطابق ملزمان نے رشتے کے تنازع کی بنیاد پر محمد نسیم، اس کی بیٹی مسمات (س) اور بھتیجے شہریار کو نشانہ بنایا۔ مسلح حملہ آور گھر میں داخل ہوئے اور فائرنگ شروع کر دی جس کے نتیجے میں محمد نسیم اور اس کا بھتیجا شہریار موقع پر ہی جاں بحق ہو گئے۔
بیٹی مسمات (س) بھی زخموں کی تاب نہ لا سکی جبکہ ان کی اہلیہ مسمات (س) شدید زخمی ہو گئیں جنہیں فوری طور پر ڈسٹرکٹ ٹیچنگ ہسپتال پشین منتقل کر دیا گیا۔ ملزمان حملے کے فوری بعد فرار ہونے میں کامیاب ہوگئے۔
واقعے کی اطلاع ملتے ہی تھانہ یارو کے ایس ایچ او اور پولیس کی ٹیم موقع پر پہنچ گئی، جاں بحق افراد کی لاشوں اور زخمی خاتون کو اسپتال پہنچایا گیا، جہاں ڈاکٹروں نے تینوں کو مردہ قرار دے دیا۔ پشین پولیس نے فوری طور پر تفتیش شروع کر دی ہے اور ملزمان کی گرفتاری کے لیے چھاپے مارے جا رہے ہیں۔
متوفی کے لواحقین نے رات گئے یارو نیشنل ہائی وے پر لاشوں کے ساتھ دھرنا دیا۔ مظاہرین نے پولیس پر سنگین الزامات عائد کرتے ہوئے کہا کہ انہیں رشتے کے تنازع کے بارے میں پیشگی اطلاع دی گئی تھی لیکن پولیس نے کوئی پیشگی کارروائی نہیں کی۔
لواحقین کا کہنا ہے کہ قاتلوں کی گرفتاری تک احتجاج جاری رہے گا اور شاہراہ بلاک کر دی جائے گی۔
اس واقعے نے ایک بار پھر پشین کے علاقے میں خاندانی اور رشتوں کے جھگڑوں کی خطرناک صورتحال کو اجاگر کر دیا ہے۔ مقامی لوگوں کا مطالبہ ہے کہ انتظامیہ ایسے تنازعات کو پرامن طریقے سے حل کرے اور قانون کی حکمرانی کو یقینی بنائے۔
پولیس کا کہنا ہے کہ تفتیش جاری ہے اور ملزمان کی شناخت کے لیے تمام ممکنہ اقدامات کیے جا رہے ہیں۔ مزید تفصیلات تفتیش مکمل ہونے کے بعد سامنے آئیں گی۔
انتظامیہ سے توقع ہے کہ ملزمان کو جلد از جلد گرفتار کر کے کیفر کردار تک پہنچایا جائے تاکہ علاقے میں امن قائم ہو اور ایسے افسوسناک واقعات کو دوبارہ رونما ہونے سے روکا جا سکے۔
مزید پڑھیں:مشرق وسطیٰ کشیدگی کے اثرات، ایل پی جی قیمتوں میں ہوشربا اضافہ
