پاکستان قطر اقتصادی تعلقات کو مزید مضبوط بنانے پر اس وقت اہم پیش رفت ہوئی جب وزیر اعظم شہباز شریف نے دوحہ میں قطر کے امیر شیخ تمیم بن حمد الثانی سے ملاقات کی۔
یہ ملاقات وزیر اعظم کے سرکاری دورہ قطر کے دوران ہوئی جس میں دونوں رہنماؤں نے تجارت، سرمایہ کاری، توانائی، دفاع اور افرادی قوت سمیت مختلف شعبوں میں تعاون بڑھانے پر تفصیلی بات چیت کی۔
وزیر اعظم نے ملاقات کو نہایت مفید اور مثبت قرار دیا اور کہا کہ دونوں ممالک نے برادرانہ تعلقات کو عملی اقتصادی شراکت داری میں تبدیل کرنے پر اتفاق کیا ہے۔
اس موقع پر نائب وزیر اعظم اسحاق ڈار اور آرمی چیف فیلڈ مارشل سید عاصم منیر سمیت اعلیٰ سطحی وفد بھی موجود تھا۔ رہنماؤں نے دوطرفہ تعلقات اور جاری تعاون کا جائزہ لیا۔
دونوں ممالک نے مشترکہ ٹاسک فورس کو فعال کرنے پر بھی اتفاق کیا تاکہ اہم شعبوں میں تعاون کو تیز کیا جا سکے اور عملی نتائج حاصل ہوں۔
ملاقات میں علاقائی صورتحال اور مشرق وسطیٰ کے حالات پر بھی تبادلہ خیال کیا گیا۔ پاکستان نے خطے میں امن کیلئے قطر کی سفارتی کوششوں کو سراہا۔
دونوں رہنماؤں نے مستقبل میں تعلقات کو مزید مضبوط بنانے اور قریبی رابطہ برقرار رکھنے کے عزم کا اعادہ کیا۔
