بدھ کے روز اسلام آباد میں اس وقت غیر معمولی صورتحال پیدا ہوئی جب خیبر پختونخوا کے وزیر اعلیٰ سہیل آفریدی نے عدالت میں گفتگو کرنے کی کوشش کی، مگر چیف جسٹس کمرہ عدالت سے اٹھ کر چلے گئے۔
بعد ازاں میڈیا سے گفتگو کرتے ہوئے وزیر اعلیٰ نے بتایا کہ انہوں نے چیف جسٹس سے ملاقات کی کوشش کی تھی، لیکن دیگر ذرائع سے ملاقات ممکن نہ ہونے پر وہ عدالت میں اپنا مؤقف پیش کرنا چاہتے تھے۔ ان کے مطابق انہوں نے سلام کیا مگر کوئی جواب نہیں ملا اور وہ ایک گھنٹہ پندرہ منٹ انتظار کرتے رہے۔
انہوں نے کہا کہ ان کا مقصد یہ ظاہر کرنا تھا کہ تحریک انصاف احتجاج سے پہلے قانونی اور پرامن راستہ اختیار کرتی ہے۔ انہوں نے مزید بتایا کہ بانی تحریک انصاف کے طبی معائنے کی درخواست بھی زیر سماعت نہیں آئی۔
تحریک انصاف کے سیکرٹری جنرل سلمان اکرم راجہ نے کہا کہ بانی تحریک انصاف کی اپنے وکلا اور اہل خانہ سے ملاقات کے لیے کوششیں جاری ہیں۔ ان کے مطابق عدالت نے ملاقاتوں کا حکم دیا تھا، مگر اس پر عمل نہیں ہوا۔
انہوں نے مزید کہا کہ طبی معائنے اور دیگر معاملات سے متعلق درخواستیں بھی دائر کی گئیں، لیکن ان پر سماعت نہیں ہوئی، جس کے بعد معاملہ سپریم کورٹ میں اٹھایا گیا ہے۔
ادھر عدالت کے احاطے میں وزیر اعلیٰ کی ویڈیو بنانے والے ایک شخص سے پولیس نے موبائل فون لے کر ویڈیو حذف کر دی، جس کے بعد موبائل واپس کر دیا گیا۔
