پنجاب حکومت نے صوبے بھر کے اسکولوں کے تعلیمی نظام میں اہم تبدیلیوں پر غور شروع کر دیا ہے۔ صوبائی وزیر تعلیم رانا سکندر حیات کے مطابق پنجاب تعلیمی کیلنڈر میں ممکنہ تبدیلیوں کے تحت موسم گرما کی طویل تعطیلات اور تدریسی اوقات کا دوبارہ جائزہ لیا جا رہا ہے۔
لاہور میں گفتگو کرتے ہوئے وزیر تعلیم نے کہا کہ لمبی گرمیوں کی چھٹیاں طلبہ کی پڑھائی کو متاثر کر رہی ہیں، اسی لیے حکومت نئے تعلیمی شیڈول پر غور کر رہی ہے۔ ان کے مطابق ایک تجویز یہ بھی زیر غور ہے کہ گرمیوں کی تعطیلات کے بعد اسکول متبادل ہفتوں میں کھولے جائیں تاکہ طلبہ کی تعلیمی سرگرمیاں متاثر نہ ہوں۔
رانا سکندر حیات نے بتایا کہ حکومت نجی تعلیمی اداروں سے مشاورت کے بعد نیا تعلیمی کیلنڈر ترتیب دینے پر بھی غور کر رہی ہے۔ اس کے ساتھ ساتھ اچانک اسکول بند ہونے کی صورت میں متبادل تدریسی منصوبے بھی تیار کیے جا رہے ہیں۔
انہوں نے کہا کہ حکومت اس بات کا جائزہ لے رہی ہے کہ جمعہ کی ہفتہ وار تعطیل تعلیمی سرگرمیوں پر کس حد تک اثر انداز ہو رہی ہے۔ وزیر تعلیم کے مطابق اسکولوں میں سالانہ کم از کم 180 تدریسی دن ہونے چاہئیں، جبکہ اس وقت بیشتر اداروں میں صرف 140 دن تدریس ہو رہی ہے۔
اسی کمی کو پورا کرنے کیلئے حکومت 30 سے 45 روزہ سمر کیمپ شروع کرنے کی تجویز پر بھی غور کر رہی ہے۔ پنجاب تعلیمی کیلنڈر سے متعلق حتمی فیصلہ موسم، خاص طور پر جنوبی پنجاب کی شدید گرمی اور سرکاری اسکولوں کے بنیادی مسائل کو مدنظر رکھ کر کیا جائے گا۔
