ممبئی(شوبز ڈیسک)بالی وڈ اداکارہ اننیا پانڈے نے ’امپوسٹر سنڈروم ’ میں مبتلا ہونے کا سنسنی خیز انکشاف کرکے تہلکہ مچادیا۔
اداکارہ اننیا پانڈے حال ہی میں اپنی ایمازون پر ریلیز ہونے والی او ٹی ٹی (اوور دی ٹاپ) سیریز ‘کال می بے‘ میں شاندار کارکردگی سے مداحوں کو متاثر کرنے میں کامیاب ہوئیں جس کے بعد اب نیٹ فلکس پر ان کی سائبر تھرلر فلم ‘کنٹرول‘ ریلیز کردی گئی ہے۔
لیکن کیا آپ جانتے ہیں کہ فلمی دنیا میں فنکارانہ صلاحیتوں سے دھوم مچانے والی اداکارہ بھی سینڈروم میں مبتلا ہیں؟؟جی ہاں اس بیماری کا انکشاف خود اننیا نے اپنے حالیہ انٹرویو میں کیا۔
اننیا پانڈے نے اپنے ‘امپوسٹر سنڈروم‘ کے بارے میں بات کی، جس کی وجہ سے وہ اپنے نام کے ساتھ جڑی خودی کی شناخت میں شک محسوس کرتی ہیں۔
اننیا کے مطابق جب کوئی ان کا نام لیتا ہے تو انہیں محسوس ہوتا ہے کہ ان کا نام حقیقت میں ان کا نہیں ہے، اور یہ احساس انہیں ایک تیسرے شخص کی طرح محسوس کراتا ہے۔
اس بارے میں بات کرتے ہوئے اننیا پانڈے نے بتایا کہ،’جب میں کسی بل بورڈ پر اپنے آپ کو دیکھتی ہوں تو مجھے ایسا لگتا ہے کہ میں جو کچھ دیکھ رہی ہوں وہ میں نہیں ہوں۔ یہی صورتحال میری فلمیں دیکھتے وقت بھی ہوتی ہے، میں انہیں ایک فلمی مداح کی طرح دیکھتی ہوں اور بھول جاتی ہوں کہ وہ اصل میں میں ہی ہوں۔‘
اسی انٹرویو میں جب ان سے پوچھا گیا کہ کیا ان کا امپوسٹر سنڈروم سوشل میڈیا کی تنقید کی وجہ سے پیدا ہوتا ہے؟ تو اننیا نے جواب دیا، ’یہ دن پر منحصر ہے۔ کچھ دن، میں کچھ منفی پڑھتی ہوں اور مجھ پر اس کا اثر نہیں ہوتا۔ دوسرے دن، میں سوچتی رہتی ہوں کہ کسی نے انسٹاگرام پر کہا کہ میں بیکار ہوں، اور میں یہ ماننے لگتی ہوں کہ شاید میں واقعی بیکار ہوں۔’
اپنے انٹرویومیں اننیا نے مزید بتایا کہ،’میں مسلسل توثیق کی طلب کرتی ہوں کیونکہ میں خود پر بھی بہت محنت کرتی ہوں۔ جب بھی کوئی ڈائریکٹر میری شوٹ کو منظور کرتا ہے، میں کبھی بھی اس سے خوش نہیں ہوتی۔ میں ہمیشہ محسوس کرتی ہوں کہ میں بہتر کر سکتی تھی۔ اگر یہ میرے ہاتھ میں ہوتا تو میں ہر چیز کو دوبارہ شوٹ کرتی کیونکہ مجھے معلوم ہے کہ میں ہمیشہ بہتری لا سکتی ہوں۔‘
امپوسٹر سنڈروم کیا ہے؟
یاد رہے کہ امپوسٹر سنڈروم ایک ایسی حالت ہے جس میں آپ اپنی مہارتوں اور کامیابیوں پر شک کرتے ہیں۔
آپ کو یہ محسوس ہوتا ہے کہ آپ اتنے باصلاحیت یا قابل نہیں ہیں جتنا کہ دوسرے سمجھتے ہیں، اور آپ کو یہ خوف ہوتا ہے کہ ایک دن لوگ اس حقیقت کو جان لیں گے۔
اگرچہ یہ کوئی ذہنی صحت کی تشخیص نہیں ہے، لیکن امپوسٹر سنڈروم مختلف شعبوں میں حقیقی نقصان کا باعث بن سکتا ہے۔ یہ خود اعتمادی کو متاثر کرتا ہے اور آپ کی پیشہ ورانہ زندگی، تعلقات، اور ذاتی خوشی پر منفی اثر ڈال سکتا ہے۔
مزیدپڑھیں :لیگی رکن اسمبلی کی نشست خالی قرار، ق لیگ نے اپنا ریفرنس واپس لے لیا
