بالی ووڈ کے معروف اداکار عامر خان نے فلموں کی ناکامی اور کامیابی سے متعلق کھل کر اظہار خیال کرتے ہوئے کہا ہے کہ کسی فلم کے ناکام ہونے کو تسلیم کرنا ہی سب سے پہلا اور ضروری قدم ہوتا ہے۔ ان کا کہنا تھا کہ فلم سازی میں کامیابی اور ناکامی دونوں حقیقت ہیں اور ہر فنکار کو اس حقیقت کو قبول کرنا چاہیے۔
ایک حالیہ انٹرویو میں عامر خان نے کہا کہ جب کوئی فلم ناظرین سے توقعات کے مطابق جڑ نہیں پاتی تو وہ سب سے پہلے اس حقیقت کو قبول کرتے ہیں۔ ان کے مطابق کسی فلم کے ناکام ہونے کے بعد اصل سوال یہ ہوتا ہے کہ آخر وہ فلم لوگوں کو متاثر کیوں نہیں کر سکی۔
اداکار نے بتایا کہ وہ ہر فلم کی ریلیز سے پہلے ہدایتکاروں کے ساتھ تفصیلی گفتگو کرتے ہیں تاکہ یہ سمجھا جا سکے کہ آیا فلم وہی بنی ہے جس کا آغاز میں تصور کیا گیا تھا یا نہیں۔ ان کے مطابق یہ تخلیقی گفتگو کسی بھی پراجیکٹ کے معیار کو جانچنے میں بہت اہم کردار ادا کرتی ہے۔
عامر خان نے اپنی مشہور فلم “پی کے” کا ذکر کرتے ہوئے بتایا کہ فلم کی ریلیز سے قبل انہیں اور ہدایتکار راج کمار ہیرانی کو محسوس ہوا کہ فلم کے دوسرے حصے میں کچھ موضوعات فلم “اوہ مائی گاڈ” سے ملتے جلتے ہیں۔ اسی وجہ سے انہوں نے فلم کے کچھ حصوں میں تبدیلیاں کیں تاکہ کہانی مزید بہتر انداز میں پیش کی جا سکے۔
اداکار کا کہنا تھا کہ فلم سازی ایک مسلسل سیکھنے کا عمل ہے اور بعض اوقات ناکامی انسان کو وہ سبق سکھا دیتی ہے جو کامیابی نہیں سکھا سکتی۔ انہوں نے کہا کہ وہ ہر ناکام فلم کے بعد اس کی وجوہات کو سمجھنے کی کوشش کرتے ہیں اور یہی عمل انہیں مستقبل میں بہتر فیصلے کرنے میں مدد دیتا ہے۔
عامر خان نے مزید کہا کہ فلمی دنیا میں کوئی بھی شخص کامیابی کا حتمی فارمولا نہیں جانتا، اس لیے فنکاروں کو اپنے دل اور تخلیقی سوچ کے مطابق کام کرنا چاہیے۔
