حرمین شریفین میں اعتکاف رمضان المبارک کے آخری عشرے کے آغاز کے ساتھ ہی شروع ہو گیا ہے۔ سعودی عرب کی دونوں مقدس مساجد میں ہزاروں رجسٹرڈ افراد اعتکاف کے لیے بیٹھ گئے ہیں۔
رپورٹس کے مطابق سعودی عرب میں رمضان کے بیسویں روزے سے حرمین شریفین میں اعتکاف کا باقاعدہ آغاز ہو چکا ہے۔ اس عبادت کے لیے 15 ہزار سے زائد افراد نے پہلے ہی رجسٹریشن کروا رکھی تھی۔
مکہ مکرمہ کی مسجد الحرام اور مدینہ منورہ کی مسجد نبوی ﷺ میں خصوصی عبادات کا سلسلہ جاری ہے۔ معتکفین زیادہ وقت نماز، تلاوت قرآن اور ذکر و اذکار میں گزار رہے ہیں۔
اس کے ساتھ عمرہ زائرین کی بڑی تعداد بھی دونوں مساجد میں موجود ہے۔ زائرین رمضان کی بابرکت راتوں میں لیلۃ القدر کی تلاش کے لیے عبادات میں مصروف ہیں۔
دوسری جانب مشرق وسطیٰ میں کشیدہ حالات کے باعث بیرون ملک کئی پروازیں منسوخ ہونے کی اطلاعات بھی سامنے آئی ہیں۔ اس صورتحال کے باوجود مسجد الحرام اور مسجد نبوی ﷺ میں زائرین کی بڑی تعداد دیکھنے میں آ رہی ہے۔
رمضان کے آخری عشرے میں حرمین شریفین کا ماحول انتہائی روحانی ہے جہاں دنیا بھر سے آئے مسلمان عبادت میں مشغول ہیں۔
