اسلام آباد (نیوز ڈیسک) مشکل معاشی حالات سے گزرتے پاکستان کو سعودی عرب کی جانب سے بھرپور یکجہتی کا پیغام ملا ہے۔ سعودی وزیر خزانہ محمد بن عبداللہ الجدعان کے اسلام آباد کے ایک روزہ دورے کے دوران دونوں ملکوں کے درمیان مالی، تجارتی اور سرمایہ کاری کے شعبوں میں تعاون وسیع کرنے پر اتفاق ہوا۔
مالی تعاون کی یقین دہانی
وزارت خزانہ کے مطابق پاکستان کی جانب سے سعودی عرب سے 5 ارب ڈالر قرض کی درخواست کی گئی جبکہ ادھار تیل کی سہولت کو مزید پانچ سال جاری رکھنے کی تجویز بھی زیرِ غور آئی۔ سعودی فریق نے پاکستان کو ہر ممکن مالی معاونت فراہم کرنے کے عزم کا اعادہ کیا۔
قرض ادائیگی کا دباؤ
خزانہ حکام کے مطابق پاکستان کو رواں ماہ تقریباً 4 ارب 80 کروڑ ڈالر کی واجبات ادا کرنی ہیں۔ ایک ارب 40 کروڑ ڈالر کے یورو بانڈز کی ادائیگی پہلے ہی مکمل کی جاچکی ہے۔ ایسے نازک مرحلے پر زرمبادلہ ذخائر کو مستحکم رکھنے کے لیے بیرونی مالی مدد انتہائی ضروری قرار دی جارہی ہے۔
اعلیٰ سطح ملاقاتیں
سعودی وزیر خزانہ نے وزیراعظم شہباز شریف سے بھی ملاقات کی جس میں نائب وزیراعظم اسحاق ڈار اور فیلڈ مارشل عاصم منیر بھی موجود تھے۔ وزیراعظم نے سعودی شاہی قیادت کے لیے نیک خواہشات کا اظہار کیا اور مسلسل اقتصادی حمایت پر سعودی عرب کا تہہ دل سے شکریہ ادا کیا۔ دونوں اطراف نے باہمی تعلقات کو نئی بلندیوں تک لے جانے کے عزم کا اعلان کیا۔
آئندہ ملاقات کی توقع
وزارت خزانہ کے اعلامیے میں بتایا گیا کہ عالمی بینک اور آئی ایم ایف کے سالانہ اجلاس کے موقع پر دونوں ممالک کے وزرائے خزانہ کے درمیان ایک بار پھر ملاقات متوقع ہے۔ سعودی وزیر خزانہ دورہ مکمل کرنے کے بعد روانہ ہوگئے، انہیں اسلام آباد ایئرپورٹ پر وفاقی وزیر خزانہ محمد اورنگزیب نے خوشگوار ماحول میں الوداع کہا۔
وزارت خزانہ کا کہنا ہے کہ یہ دورہ دونوں برادر ممالک کے درمیان گہری ہوتی شراکت داری کی واضح علامت ہے۔
مزیدپڑھیں:پی ایس ایل 11: عثمان طارق کے بولنگ ایکشن پر میدان میں تناز ع
