اسلام آباد(ویب ڈیسک)دنیا میں کروڑوں افراد کو سر درد کی تکلیف کا سامنا ہوتا ہے جو انسان کے روزمرہ کے امور کی انجام دہی میں رکاوٹ بن جاتا ہے۔
بہت ساری چیزیں سردرد کا باعث بن سکتی ہیں جس میں نیند کی کمی، کوئی پریشانی، ذہنی دباؤ، بہت زیادہ سوچیں اور زیادہ دیر کمپیوٹر یا موبائل وغیرہ کا استعمال شامل ہے۔
اکثر لوگ سر درد کے لیے دوا لینے سے گریز کرتے ہیں اور چاہتے ہیں گھریلو اشیا سے ان کی یہ تکلیف دور ہوجائے۔
تو یہاں ہم چند ایسی ہی چیزوں کا ذکر کررہے ہیں جس سے سر درد سے نجات میں مدد مل سکتی ہے۔
مساج تھراپی
مساج ایک تھوڑا پُر تعیش سا عمل سمجھا جاتا ہے لیکن سر درد کے لیے اس کا اثر حیرت انگیز طور پر مفید ہے، بعض اوقات سر میں درد سخت ورزش کے نتیجے میں پٹھوں کی اکڑن یا غلط انداز میں بیٹھنے کی وجہ سے جسم کے اوپری حصے میں تناؤ کی وجہ سے ہوتا ہے۔
اپنی درمیانی انگلی سے آنکھوں کے درمیان یا پیشانی کے آغاز کی جگہ کو مساج کریں، اپنی انگلی کو گھڑی کی سوئیوں کی طرح دو سے تین منٹ تک گھمائیں اس سے آپ کو شدید سردرد سے نجات مل سکے گی۔
گرم یا ٹھنڈی ٹکور
پٹھوں کے تناؤ سے ہونے والے سر کے درد کے لیے، گرم یا ٹھنڈی ٹکور راحت فراہم کر سکتی ہے۔ ٹھنڈے حصے کے لیے، آپ کی جلد کو نقصان پہنچانے سے بچنے کے لیے ایک پتلے کپڑے سے ڈھانپ کر آئس پیک یا کپڑے میں لپیٹ کر برف کا استعمال کریں۔
آئس پیک یا ایک کپڑے کو ٹھنڈے پانی میں ڈبو دیں پھر اسے نکال کر لپیٹ لیں اور پھر اپنی پیشانی یا گردن کے پیچھے رکھ دیں تاکہ سخت مسلز کو سکون مل سکے۔
اسی طرح آدھے سر کے درد سے نجات کے لیے بھی اسی طریقہ کار کو آزمایا جاسکتا ہے مگر اس میں ٹھنڈے کی بجائے گرم پانی کا استعمال کرنا چاہیے۔
پانی کا استعمال
پانی کی کمی بھی سر درد کی وجہ بن سکتی ہے لیکن اس سے آسانی سے بچا جا سکتا ہے۔ ایک گلاس پانی سے اس تکلیف کو دور کرنے میں اتنی ہی مدد مل سکتی ہے جتنی الیکٹرولائٹ پر مشتمل مشروبات سے۔
لیکن جس طرح ایسے مشروبات ہیں جو سر درد کو کم کر سکتے ہیں، ایسے ہی مشروبات ہیں جو انہیں متحرک کر سکتے ہیں۔
بہت زیادہ کافی یا بہت زیادہ کیفین سے بھرے سافٹ ڈرنکس پینا سر درد کا باعث بن سکتا ہے۔
سانس لینے کی مشق
سانس لینا ایسا عمل ہے جو آپ ہر وقت کرتے ہیں! یہ کچھ عجیب لگ سکتا ہے لیکن تناؤ سے متعلق سر درد کو بعض اوقات سانس لینے کی باقاعدہ مشقوں سے دور کیا جاسکتا ہے جو آپ کے دماغ پر توجہ مرکوز کرنے اور آپ کے پٹھوں کو آسان بنانے میں مدد کرتی ہے۔
اپنے گھر، دفتر، یا دوسری جگہ پر آرام دہ کرسی کے ساتھ ایک پرسکون جگہ تلاش کرکے شروع کریں جہاں سے آپ کا دھیان نہ بھٹک جائے۔ اس کے بعد، آہستہ گہری سانس لیں پانچ سیکنڈ کے لیے سانس لیں
پھر پانچ سیکنڈ کے لیے باہر نکالیں۔
اروما تھراپی
اروما تھراپی اس بات کا مطالعہ ہے کہ کس طرح کچھ مخصوص بو دماغ میں مثبت اور یہاں تک کہ شفا بخش ردعمل کو متحرک کرسکتی ہیں۔
کچھ مہکوں سے سر درد سے نجات یا اس میں کمی ہونے کے شواہد ملتے ہیں۔
ان میں خوشبوؤں میں پیپرمنٹ کا عرق، یوکلپٹس اور لیوینڈر آئل شامل ہیں جو بہت سے مقامی ہیلتھ فوڈ اسٹورز یا آن لائن پر آسانی سے دستیاب ہیں۔
ادرک کی چائے
ادرک سردرد سے نجات کے لیے ایک بہترین چیز ہے جو سر میں جانے والی خون کی شریانوں کی سوجن کو کم کرکے سردرد سے نجات دیتی ہے۔ ادرک کے تین ٹکڑوں کو دو کپ پانی میں ڈال کر آدھے گھنٹے تک ڈھک کر رکھیں اور پھر اسے چائے کی شکل میں تیار کرکے استعمال کرلیں۔
کافی
ایک امریکی تحقیق کے مطابق کافی میں موجود جز کیفین خون کی شریانوں کی سوجن کو کم کرتا ہے جس سے سردرد کی شدت میں بھی کمی آتی ہے۔
اس تحقیق کے دوران رضاکاروں کے دو گروپ میں تقسیم کیا گیا اور ایک گروپ کو کیفین جبکہ دوسرے کو سردرد کی گولی دی گئی۔ نتائج سے معلوم ہوا کہ کیفین سے ان کے سر کا درد مکمل طور پر ختم ہوگیا۔
پاؤں پانی میں ڈبو دیں
زیریں جسم میں گردش کرتا خون سر میں خون کی شریانوں پر سے دباؤ کم کرتا ہے اور سب سے نچلا حصہ تو ظاہر ہے پاؤں ہی ہوگا۔ سردرد کی شدت میں کمی لانے کے لیے اپنے پیروں کو مسٹرڈ پاؤڈر ملے نیم گرم پانی سے بھرے کسی چھوٹے ٹب میں ڈبو دیں۔ ایسا آدھے گھنٹے تک کریں پھر پیروں کو باہر نکال کر کپڑے سے خشک کرلیں۔
سر پر پٹی باندھنا
اسکارف، پٹی یا کوئی کپڑا اپنی پیشانی کے گرد لپیٹ لینے سے کھوپڑی میں خون کی روانی کم ہوتی ہے اور سوجن کی شکار شریانوں پر مثبت اثرات مرتب ہوتے ہیں۔ کچھ منٹ تک پٹی باندھے رکھنے سے ہی آپ کو کچھ ریلیف مل سکے گا۔
مزیدپڑھیں:مداحوں کی نامناسب حرکت، شکیرا اسٹیج چھوڑ گئیں
