لاہور (نیوز ڈیسک) معروف یوٹیوبر اور سوشل میڈیا اسٹار رجب بٹ حالیہ دنوں مختلف تنازعات کے باعث شدید تنقید کی زد میں ہیں۔ فیملی وی لاگز، پُرتعیش طرزِ زندگی اور پرجوش اندازِ گفتگو سے شہرت پانے والے رجب بٹ اب ایک کے بعد ایک اسکینڈل کا سامنا کر رہے ہیں۔ شادی کے بعد مبینہ افیئرز کے انکشافات نے سوشل میڈیا پر ہلچل مچا دی ہے، جہاں ایک جانب ان کی اہلیہ ایمان بٹ کے لیے ہمدردی میں اضافہ ہو رہا ہے، وہیں رجب کے کردار پر سوالات بھی شدت اختیار کر گئے ہیں۔
اسی دوران رجب بٹ کی والدہ نے اپنے بیٹے کے حق میں وی لاگ جاری کر کے معاملے کو ایک نئی سمت دے دی۔ اپنے بیان میں ان کا کہنا تھا کہ ’’رجب کا اعتراف سن کر مجھے صدمہ ہوا، مگر ہر لڑکے کا ایک ماضی ہوتا ہے، اور اللہ توبہ کرنے والوں کو معاف کر دیتا ہے۔‘‘
تاہم ان کے اس مؤقف نے سوشل میڈیا پر ایک نئی بحث چھیڑ دی۔ صارفین کی بڑی تعداد نے کہا کہ غلطی کو غلط کہنا ہی درست طرزِ عمل ہے، خاص طور پر جب کوئی عوامی شخصیت لاکھوں نوجوانوں پر اثر ڈال رہی ہو۔ ناقدین کا کہنا ہے کہ ماؤں کا بیٹوں کی غلطیوں پر پردہ ڈالنے کا رجحان معاشرتی بگاڑ کو بڑھا رہا ہے، کیونکہ یہی رویہ انہیں اپنے اعمال کے نتائج سے بے خوف بنا دیتا ہے۔
کئی صارفین نے یہ سوال بھی اٹھایا کہ اگر یہی غلطی کسی بیٹی یا بہو سے سرزد ہوتی تو کیا والدہ کا یہی رویہ برقرار رہتا؟
سوشل میڈیا پر جاری بحث کے مطابق، یہ معاملہ اب صرف رجب بٹ تک محدود نہیں رہا، بلکہ ایک بڑے سماجی سوال میں بدل چکا ہے:
کیا والدین اپنی اولاد کی غلطیوں کو چھپا کر دراصل معاشرے میں احتساب کے تصور کو کمزور کر رہے ہیں؟
مزیدپڑھیں:واٹس ایپ کے ذریعے اب بغیر فون نمبر کال کریں، شاندار فیچر آگیا
