شہباز گل میرے چھوٹے بھائی ہیں، آپ نے میری غصے میں بنائی گئی ویڈیو چلائی لیکن جو عمران خان کی حمایت میں تھی وہ نہیں چلائی: وسیم عباس

اداکار وسیم عباس(Wasim Abbas) نے شہباز گل(Shehbaz Gill) کے حالیہ بیان پر تفصیلی ردعمل دیتے ہوئے کہا ہے کہ ان کا سیاست سے کوئی تعلق نہیں اور انہیں بار بار سیاسی تنازعات میں گھسیٹنے کی کوشش کی جا رہی ہے۔

وسیم عباس کے مطابق وہ گزشتہ 40 سال سے شوبز انڈسٹری سے وابستہ ہیں اور ان کی شناخت صرف ایک اداکار کی ہے، نہ کہ کسی سیاسی کارکن یا رہنما کی۔ انہوں نے کہا کہ ان کی جانب سے بنائی گئی ایک ویڈیو کو سیاق و سباق سے ہٹ کر پیش کیا گیا، جس سے غلط فہمیاں پیدا ہوئیں۔

ان کا کہنا تھا کہ وہ ایک جذباتی لمحے میں ویڈیو ریکارڈ کر بیٹھے تھے، تاہم بعد میں انہوں نے وضاحتی ویڈیو بھی بنائی جس میں انہوں نے واضح کیا کہ ان کا مقصد کسی سیاسی جماعت کی حمایت یا مخالفت نہیں تھا۔ وسیم عباس نے افسوس کا اظہار کیا کہ اس وضاحت کو نشر نہیں کیا گیا جبکہ صرف وہی حصہ چلایا گیا جس سے تنازع پیدا ہوا۔

اداکار نے شہباز گل کو مخاطب کرتے ہوئے کہا کہ وہ انہیں اپنا چھوٹا بھائی سمجھتے ہیں اور ان کے ساتھ ان کا ہمیشہ احترام کا رشتہ رہا ہے۔ تاہم انہوں نے شکوہ کیا کہ ان کی باتوں کو مکمل انداز میں پیش نہیں کیا گیا اور سوشل میڈیا پر مخصوص کلپس کے ذریعے غلط تاثر قائم کیا گیا۔

وسیم عباس نے کہا کہ ان کا کسی سیاسی جماعت سے کوئی تعلق نہیں، نہ ہی وہ مستقبل میں سیاست میں آنے کا ارادہ رکھتے ہیں۔ ان کے مطابق وہ ایک فنکار ہیں اور اسی حیثیت سے اپنی زندگی گزارنا چاہتے ہیں۔

انہوں نے مزید کہا کہ وہ عوامی مسائل پر بطور شہری رائے دے سکتے ہیں، لیکن اس کا مطلب یہ نہیں کہ وہ کسی سیاسی ایجنڈے کا حصہ ہیں۔ ان کا کہنا تھا کہ بعض لوگ ان کے بیانات کو سیاسی رنگ دے کر غیر ضروری تنازع پیدا کرتے ہیں۔

وسیم عباس نے یہ بھی واضح کیا کہ ان کی زندگی میں کسی سیاسی رہنما، چاہے وہ میاں نواز شریف، شہباز شریف یا مریم نواز ہوں، سے کوئی ذاتی ملاقات نہیں ہوئی، جبکہ عمران خان سے ملاقاتیں صرف شوز یا محدود مواقع پر ہوئیں۔

امریکی فضائیہ کا ایندھن بردار طیارہ ایمرجنسی سگنل کے بعد لاپتہ

انہوں نے کہا کہ ان کا مؤقف ہمیشہ ایک ہی رہا ہے کہ وہ فنکار ہیں اور اسی حیثیت میں رہنا چاہتے ہیں۔ ان کے مطابق انہیں بار بار سیاست میں گھسیٹنا نہ صرف غلط ہے بلکہ ان کے پیشہ ورانہ کردار کے ساتھ بھی ناانصافی ہے۔

آخر میں انہوں نے شہباز گل اور دیگر متعلقہ افراد سے اپیل کی کہ ان کے بیانات کو مکمل تناظر میں دیکھا جائے اور سوشل میڈیا کلپس کے ذریعے کسی بھی شخص کی رائے کو مسخ نہ کیا جائے۔