اسلام آباد(نیوزڈیسک) حکومت وفاقی سرکاری دفاتر میں چھ روزہ ورک ہفتہ بحال کرنے کے لیے ہفتہ وار چھٹی ختم کرنے پر غور کر رہی ہے۔کابینہ ڈویژن نے تمام وزارتوں سے سفارشات طلب کر لی جنہیں حتمی فیصلے کے لیے وفاقی کابینہ کو بھجوایا جائے گا۔حتمی فیصلے کا اعلان آنے والے دنوں میں کیا جائے گا کیونکہ وفاقی حکومت نے چھٹیوں پر سفارشات کی درخواست کی تھی۔
سفارشات منظور ہونے پر، 1 جولائی 2024 سے دو دن کی ہفتہ وار چھٹی ختم کر دی جائے گی۔فی الحال، زیادہ تر وفاقی حکومت کے محکمے ہفتہ اور اتوار کو دو ہفتہ وار چھٹیاں منارہے ہیں۔پبلک سیکٹر کے ملازمین سے بھی توقع ہے کہ وہ ہفتہ وار تعطیلات میں سے ایک کو ختم کرنے کی تجویز کی مخالفت کریں گے۔
یہاں یہ بات قابل ذکر ہے کہ وفاقی کابینہ نے 2022 میں توانائی کے تحفظ کے منصوبے کے تحت سرکاری دفاتر میں دو دن کی ہفتہ وار تعطیلات کی منظوری دی تھی کیونکہ ملک کو اب بھی توانائی کے شدید بحران کا سامنا ہے جو عموماً گرمیوں کے موسم میں بڑھ جاتا ہے۔شہباز شریف کے آخری دور میں حکومت نے سرکاری ملازمین کے لیے ہفتہ کی چھٹی بحال کرنے پر غور کیا۔ تاہم اس فیصلے کو خاصی مزاحمت کا سامنا کرنا پڑا اور اس پر عمل درآمد نہیں ہوا۔
