کراچی میں گھر میں ڈکیتی کا بڑا واقعہ کورنگی کے علاقے میں پیش آیا جہاں مسلح ملزمان کروڑوں روپے مالیت کا سامان لوٹ کر فرار ہوگئے۔
یہ واردات زمان ٹاؤن سیکٹر 35 اے میں واقع ایک رہائشی مکان میں ہوئی۔ پولیس کے مطابق تین مسلح افراد اسلحے کے زور پر گھر میں داخل ہوئے۔
متاثرہ خاندان نے بتایا کہ ملزمان نے اہل خانہ کو یرغمال بنا لیا۔ تمام افراد کو ایک کمرے میں بند کردیا گیا۔
ملزمان نے گھر کی تلاشی لی اور اطمینان سے سونا اور نقدی جمع کرتے رہے۔
متاثرہ شہری ظفر کے مطابق تقریباً 22 تولہ سونا اور ایک کروڑ 85 لاکھ روپے نقدی لوٹ لی گئی۔ مجموعی نقصان تقریباً 3 کروڑ روپے بتایا جا رہا ہے۔
کراچی میں گھر میں ڈکیتی کی سی سی ٹی وی فوٹیج بھی سامنے آگئی ہے۔ ویڈیو میں ملزمان کو گھر میں داخل ہوتے دیکھا جا سکتا ہے۔
پولیس نے متاثرہ شہری کی مدعیت میں تھانہ کورنگی میں مقدمہ درج کرلیا ہے۔ تفتیش کے لیے سی سی ٹی وی ریکارڈ حاصل کرلیا گیا ہے۔
پولیس کا کہنا ہے کہ فوٹیج کی مدد سے ملزمان کی شناخت کی جا رہی ہے۔ مزید تحقیقات جاری ہیں اور گرفتاری کے لیے کوششیں تیز کردی گئی ہیں۔
