جاپان، جو دنیا بھر میں نیند کی شدید کمی کے شکار ممالک میں شامل ہے، اب ایک دلچسپ حل کی جانب بڑھ رہا ہے، جہاں ایک کمپنی نے شہریوں کو بہتر نیند فراہم کرنے کے لیے ایک منفرد ‘اسمارٹ جیکٹ متعارف کرائی ہے۔
یہ جیکٹ مختصر قیلولے یا فوری نیند کے لیے مددگار ثابت ہو سکتی ہے، کیونکہ یہ صارف کے دل کی دھڑکن اور جسمانی درجہ حرارت جیسے بائیومیٹرک ڈیٹا کا استعمال کرتی ہے تاکہ نیند کا موزوں لمحہ شناخت کیا جا سکے۔ اس کا “سلیپ موڈ” ہڈ میں نصب ہے، جسے فعال کرکے کسی بھی جگہ نیند لینا ممکن بنایا جا سکتا ہے۔
یہ جیکٹ عام لباس کی طرح پہنی جا سکتی ہے، تاہم حجم میں بڑی ہے۔ اگرچہ فی الحال یہ مارکیٹ میں دستیاب نہیں، مگر 24 جون سے 7 جولائی 2025 تک اوساکا میں منعقد ہونے والی ایکسپو 2025 میں عوام اسے آزما سکیں گے۔
کمپنی کے مطابق اس اختراع کا مقصد نیند کی اہمیت کے بارے میں شعور پیدا کرنا ہے، اور اس منصوبے کو جاپان کی وزارت معیشت، تجارت و صنعت کی مالی معاونت بھی حاصل ہے۔
