اسلام آباد(ویب ڈیسک )محکمہ موسمیات کے مطابق 25 سے 28 مارچ کے دوران ایک مغربی ہوا کا نظام ملک میں داخل ہونے کا امکان ہے، جس کے اثرات خاص طور پر بلوچستان میں زیادہ شدت کے ساتھ ظاہر ہوں گے۔کراچی کے محکمہ موسمیات کے ڈپٹی ڈائریکٹر انجم نذیر ضیغم کے مطابق یہ سسٹم ایران کے راستے بلوچستان میں داخل ہوگا، جہاں تیز ہوائیں اور موسلا دھار بارش متوقع ہے۔اس کے اثرات سندھ پر بھی پڑیں گے، جن میں کراچی شامل ہے، جہاں تیز ہواؤں کے ساتھ اچانک بارش کا امکان ہے۔کراچی میں آج موسم صاف اور دھوپ کھلی ہوئی ہے، جبکہ آئندہ 2 روز کے دوران مطلع جزوی ابر آلود رہنے کی توقع ہے۔اس دوران دن کے وقت درجہ حرارت 30 سے 32 ڈگری سینٹی گریڈ کے درمیان رہنے کا امکان ہے۔ڈپٹی ڈائریکٹر کے مطابق فروری اور مارچ میں ملک بھر میں درجہ حرارت معمول سے زیادہ رہا، جس کے باعث آنے والے دنوں میں موسمی شدت اور تغیر میں اضافہ ہو سکتا ہے۔
ادھر اتوار کے روز پاکستان محکمہ موسمیات نے بتایا تھا کہ مغربی ہوا کا ایک اور سلسلہ ملک کے بیشتر علاقوں کو متاثر کر رہا ہے، جس کے باعث کراچی میں گرج چمک کے ساتھ بارش کی توقع ہے۔
دیہی سندھ کے مختلف اضلاع، جن میں لاڑکانہ، قمبر شہدادکوٹ، شکارپور، جیکب آباد، سکھر، نوشہروفیروز اور دادو شامل ہیں، میں بھی گرج چمک کے ساتھ بارش کا امکان ظاہر کیا گیا ہے۔
عیدالفطر کے پہلے روز کراچی کے مختلف علاقوں میں صبح سویرے گرج چمک کے ساتھ بارش ہوئی، جو وقفے وقفے سے تیز ہوتی رہی۔
اس بارش نے عید کی خوشیوں کو متاثر کیا اور کئی علاقوں میں آمد و رفت مشکل ہونے کے باعث شہریوں کو اپنے منصوبے تبدیل کرنا پڑے۔
مزیدپڑھیں:راولپنڈی: وزیراعلیٰ پنجاب کاشہر کی سب سے بڑی اور قدیمی جامع مسجد کی مکمل اپ گریڈیشن کا حکم
