قوموں کا عروج و زوال کوئی اچانک رونما ہونے والا حادثہ نہیں ہوتا بلکہ یہ ایک طویل اخلاقی، روحانی اور سماجی عمل کا منطقی نتیجہ ہوتا ہے۔ تاریخ بظاہر اسے سیاسی سازشوں، معاشی بحرانوں یا فوجی شکست و فتح کے تناظر میں بیان کرتی ہے۔ مگر قرآنِ مجید اس پورے عمل کو ایک اٹل الٰہی قانون کے طور پر پیش کرتا ہے، جو ہر دور اور ہر قوم پر یکساں طور پر نافذ ہوتا ہے۔ قرآن ماضی کی اقوام کے واقعات کو محض داستان کے طور پر نہیں سناتا بلکہ انہیں زندہ اور بیدار کرنے والے اسباق بنا کر پیش کرتا ہے تاکہ حال اور مستقبل کی قومیں یہ سمجھ سکیں کہ زوال ہمیشہ باہر سے نہیں آتا بلکہ اس کی جڑیں اندر ہی اندر پنپتی ہیں۔ سورۂ انفال میں ارشاد ہوتا ہے: “یہ اللہ کا وہی طریقہ ہے جو پہلے بھی گزر چکا ہے، اور تم اللہ کے طریقے میں کوئی تبدیلی نہ پاؤ گے”۔ یہ اعلان اس حقیقت پر مہر ثبت کرتا ہے کہ عروج و زوال کے اصول اٹل ہیں اور ان سے انحراف ہمیشہ یکساں انجام تک لے جاتا ہے۔
قرآن جن اقوام کا ذکر کرتا ہے مثلا قوم عاد، قوم ثمود، قومِ لوط اور آل فرعون۔ ان کی تباہی محض قدرتی آفات کا نتیجہ نہیں تھی بلکہ ان کے اخلاقی انحطاط، ظلم، سرکشی اور ناشکری کا منطقی انجام تھی۔ یہی اصول تاریخ کے آئینے میں بھی جھلکتا ہے، جہاں رومی سلطنت، عباسی خلافت، اندلس اور عثمانی خلافت جیسی عظیم طاقتیں بیرونی حملوں سےپہلے اندرونی کمزوریوں کےہاتھوں شکست کھاتی نظر آتی ہیں۔ درحقیقت، بیرونی حملے اکثر آخری ضرب ہوتے ہیں، اصل شکست اندر سے ہو چکی ہوتی ہے۔
قومی زوال کی بنیاد سب سے پہلے ایمان اور اخلاقی اقدار سے دوری میں رکھی جاتی ہے۔ جب کوئی قوم اپنے خالق سے تعلق کمزور کر لیتی ہے تو اس کا اجتماعی ضمیر بھی مفلوج ہو جاتا ہے۔ قومِ عاد اپنی جسمانی قوت اور ظاہری شان پر نازاں تھی اور اللہ کی نشانیوں کو جھٹلاتی رہی، یہاں تک کہ تیز و تند ہوا نے اسے نیست و نابود کر دیا۔ ثمود اپنی تہذیبی ترقی اور فنِ تعمیر پر فخر کرتی تھی، مگر صالحؑ کی دعوت کو ٹھکرا کر زلزلے کا شکار ہوئی۔ فرعون سیاسی و عسکری طاقت کا استعارہ تھا مگر ظلم اور تکبر نے اسے دریا کی موجوں میں غرق کر دیا۔ یہ سب اس حقیقت کی گواہی دیتے ہیں کہ جب اخلاقی حدود پامال ہو جائیں، حلال و حرام کی تمیز مٹ جائے اور مادی قوت کو الٰہی اصولوں پر فوقیت دی جائے، تو قوم کا باطنی ڈھانچہ کھوکھلا ہو جاتا ہے۔
تاریخ بھی اسی قرآنی حقیقت کی تصدیق کرتی ہے۔ رومی سلطنت کے آخری ادوار میں بدعنوانی، عیش پرستی اور اخلاقی گراوٹ عام ہو چکی تھی، جس نے داخلی انتشار کو جنم دیا۔ عباسی خلافت میں علمی و تہذیبی بلندیوں کے بعد درباری عیاشی اور اخلاقی انحطاط نے ریاست کو اندر سے کمزور کر دیا۔ یوں اخلاقی زوال ایک خاموش دشمن بن کر قوموں کو اندر ہی اندر گھن کی طرح چاٹ جاتا ہے۔
قرآن قومی زوال کی سب سے بڑی وجہ ظلم کو قرار دیتا ہے۔ ظلم چاہے سیاسی ہو، معاشی، عدالتی یا سماجی۔ جب وہ اجتماعی صورت اختیار کر لے تو اللہ کی گرفت یقینی ہو جاتی ہے۔ قومِ لوط کی تباہی اس کی واضح مثال ہے، جہاں سماجی بگاڑ اور اخلاقی بے راہ روی عروج پر تھی۔ تاریخ میں اندلس کا زوال بھی اسی اصول کی عملی تصویر ہے؛ داخلی اختلافات، ناانصافی اور اقتدار کی کشمکش نے اس شاندار تہذیب کو کمزور کر دیا، جس کے بعد ریکونکوئسٹا (Reconquista) نے اسے صفحۂ ہستی سے مٹا دیا۔ عثمانی سلطنت میں بھی بدعنوانی، ظالمانہ ٹیکسوں اور انتظامی نااہلی نے عوام اور حکمرانوں کے درمیان خلیج پیدا کر دی، جو بالآخر زوال پر منتج ہوئی۔
زوال کا ایک نازک مرحلہ وہ ہوتا ہے جب قوم حق کو پہچان لینے کے باوجود اسے قبول کرنے سے انکار کر دیتی ہے۔ قرآن اس کیفیت کو دلوں پر مہر لگ جانا قرار دیتا ہے۔ اس مقام پر نصیحت بے اثر ہو جاتی ہے، خیر و شر کے پیمانے بدل جاتے ہیں اور جذبات دلیل پر غالب آ جاتے ہیں۔ بظاہر ایسی قومیں مادی خوشحالی حاصل کر لیتی ہیں، مگر قرآن اسے مہلت کہتا ہے، جو دراصل گرفت سے پہلے کی آخری ڈھیل ہوتی ہے۔ تاریخ بتاتی ہے کہ رومی اور عباسی ادوار کے آخری مراحل میں اہلِ دانش کی تنبیہات کو مسلسل نظر انداز کیا گیا، جس کا نتیجہ اچانک اور فیصلہ کن زوال کی صورت میں نکلا۔
علم، تحقیق اور غور و فکر سے دوری بھی قومی پسماندگی کی ایک بنیادی وجہ ہے۔ قرآن کا پہلا حکم “اقرأ” محض لفظ نہیں بلکہ ایک تہذیبی اعلان ہے۔ جب قومیں سوال کرنا چھوڑ دیں، تقلید محض کو تحقیق پر ترجیح دیں تو فکری جمود جنم لیتا ہے۔ عثمانی سلطنت کا یورپی سائنسی انقلاب سے لاتعلق رہنا اور اندلس میں علمی زوال، اس حقیقت کی واضح مثالیں ہیں کہ علم سے دوری قوموں کو دوسروں کا محتاج بنا دیتی ہے۔
قومی وحدت کا شیرازہ بکھرنا بھی زوال کی ایک نمایاں علامت ہے۔ قرآن تفرقے سے خبردار کرتا ہے اور اجتماعی وحدت کو طاقت کا سرچشمہ قرار دیتا ہے۔ رومی سلطنت کی مشرقی و مغربی تقسیم ہو یا عباسی دور کی علاقائی بغاوتیں، ہر جگہ داخلی انتشار نے بیرونی دشمنوں کے لیے راستہ ہموار کیا۔
اسی طرح نعمتوں کی ناشکری بھی زوال کو دعوت دیتی ہے۔ جب وسائل کو امانت کے بجائےاستحقاق سمجھا جائے، دولت چند ہاتھوں میں سمٹ جائے اور عوام محرومی کا شکار ہوں، تو وہ نعمتیں چھن جاتی ہیں۔ تاریخ کی بڑی سلطنتیں اس اصول کی زندہ مثال ہیں۔ آخرکار، خود احتسابی کی کمی زوال کو حتمی بنا دیتی ہے۔ جب اصلاح کی آواز کو دشمنی سمجھا جائے اور غلطی کا اعتراف کمزوری تصور کیا جائے، تو قوم تاریخ کے ملبے تلے دب جاتی ہے۔ قرآن کا اعلان بالکل واضح ہے کہ اللہ کسی قوم کی حالت نہیں بدلتا جب تک وہ خود کو بدلنے کا عزم نہ کرے۔ اصل معرکہ میدانِ جنگ میں نہیں، ضمیر کے اندر برپا ہوتا ہے اور جو قوم اس معرکے میں سرخرو ہو جائے، وہی تاریخ میں زندہ رہتی ہے۔
