نئی نسل سے تعلق رکھنے والے نوجوان (Gen Z) ملازمین اب روایتی ملازمت کے تصور کو تبدیل کرتے ہوئے بہتر مواقع، ترقی اور ذہنی سکون کو زیادہ اہمیت دینے لگے ہیں، جس کے باعث “آفس فروگنگ” (Office Frogging) کا رجحان تیزی سے بڑھ رہا ہے۔
ماہرین کے مطابق آج کے دور میں ملازمت تبدیل کرنا پہلے کی نسبت زیادہ آسان ہو گیا ہے، جس کی وجہ سے نوجوان پروفیشنلز ایک ہی کمپنی سے طویل وابستگی کے بجائے بہتر تنخواہ اور بہتر ورک لائف بیلنس کے لیے بار بار نوکریاں تبدیل کر رہے ہیں۔
آفس فروگنگ کیا ہے؟
آفس فروگنگ سے مراد ملازمین کا ایک کمپنی سے دوسری کمپنی میں تیزی سے منتقل ہونا ہے، جس کا مقصد بہتر کیریئر مواقع، زیادہ تنخواہ اور بہتر کام کا ماحول حاصل کرنا ہوتا ہے۔
ماہرین کا کہنا ہے کہ نئی نسل کے لیے اب ایک ہی ادارے میں سالوں گزارنا کامیابی کی علامت نہیں رہا بلکہ وہ اسے محدود سوچ تصور کرتے ہیں۔ اس کے برعکس وہ تیز رفتار ترقی، لچکدار ماحول اور ذہنی سکون کو ترجیح دیتے ہیں۔
وزیر اعظم اپنا گھر پروگرام اوورسیز پاکستانیوں کیلئے خوشخبری!
رپورٹس کے مطابق جین زی ملازمین اپنی پہلی نوکری میں اوسطاً ایک سال کے قریب وقت گزارتے ہیں، جو پچھلی نسلوں کے مقابلے میں نمایاں طور پر کم ہے۔ یہ رجحان نہ صرف پاکستان بلکہ امریکہ اور یورپ سمیت عالمی سطح پر بھی دیکھا جا رہا ہے۔
ماہرین کے مطابق یہ تبدیلی کمپنیوں کے لیے ایک بڑا چیلنج بن چکی ہے، کیونکہ اب اداروں کو صرف تنخواہ میں اضافہ کافی نہیں بلکہ بہتر ورک کلچر، تربیتی مواقع اور مثبت ماحول بھی فراہم کرنا پڑ رہا ہے تاکہ ملازمین کو برقرار رکھا جا سکے۔
تاہم اس رجحان کے کچھ منفی پہلو بھی سامنے آ رہے ہیں۔ بار بار نوکریاں تبدیل کرنے سے بعض اوقات ملازمین کے کیریئر میں عدم استحکام پیدا ہو سکتا ہے اور سی وی پر بھی اس کا اثر پڑ سکتا ہے۔
ماہرین کا مشورہ ہے کہ ملازمت کی تبدیلی ہمیشہ سوچ سمجھ کر اور واضح مقصد کے تحت ہونی چاہیے تاکہ کیریئر کی سمت متاثر نہ ہو۔
مجموعی طور پر “آفس فروگنگ” کو جدید دور کی ایک علامت قرار دیا جا رہا ہے، جہاں ملازمت اب ایک سیدھی لکیر کے بجائے ایک متحرک اور بدلتا ہوا سفر بن چکی ہے۔
